तामलवाडी : तुळजापूर तालुक्यातील काटी येथे चिंचेच्या झाडाच्या फांद्या तोडण्याच्या कारणावरून झालेल्या वादातून एका ५२ वर्षीय व्यक्तीला दोघा भावांनी शिवीगाळ करत काठीने आणि लाथाबुक्क्यांनी मारहाण करून जखमी केल्याची घटना घडली आहे. याप्रकरणी तामलवाडी पोलीस ठाण्यात अविनाश श्रीधर आंबेकर आणि आदेश श्रीधर आंबेकर (दोघे रा. काटी) यांच्याविरोधात गुन्हा दाखल करण्यात आला आहे.
फिर्यादी चंद्रकांत कचरू क्षिरसागर (वय ५२, रा. काटी) यांनी दिलेल्या तक्रारीनुसार, ही घटना १० मे २०२५ रोजी दुपारी २ वाजण्याच्या सुमारास काटी गावात घडली. चंद्रकांत हे चिंचेच्या झाडाच्या फांद्या तोडत असताना, आरोपी अविनाश आंबेकर आणि आदेश आंबेकर यांनी त्यांना अडवले. ‘झाडाच्या फांद्या का तोडतो’ असे म्हणत आरोपींनी चंद्रकांत यांना शिवीगाळ केली आणि त्यानंतर लाथाबुक्क्यांनी तसेच काठीने मारहाण करून जखमी केले.
या घटनेनंतर चंद्रकांत क्षिरसागर यांनी ११ मे २०२५ रोजी तामलवाडी पोलीस ठाण्यात फिर्याद दाखल केली. त्यांच्या तक्रारीवरून पोलिसांनी अविनाश आंबेकर आणि आदेश आंबेकर यांच्या विरोधात भारतीय न्याय संहिता (BNS) कलम ११८(१), ११५(२), ३५२, ३५१(२), ३५१(३), आणि ३(५) अन्वये गुन्हा नोंदवला आहे. घटनेचा पुढील तपास तामलवाडी पोलीस करत आहेत.
