नळदुर्ग – तुळजापूर तालुक्यातील केशेगाव येथे जमिनीच्या वादातून एका महिलेला शिवीगाळ करत लाथाबुक्क्यांनी आणि काठीने मारहाण करून जखमी केल्याची घटना घडली आहे. याप्रकरणी श्रीकांत सिताराम जाधव (रा. केशेगाव) याच्याविरुद्ध नळदुर्ग पोलीस ठाण्यात गुन्हा दाखल करण्यात आला आहे. निर्मला शिवाजी जाधव (वय ४०, रा. केशेगाव) यांनी यासंदर्भात फिर्याद दिली आहे.
पोलिसांनी दिलेल्या माहितीनुसार, फिर्यादी निर्मला जाधव यांच्या सासू गमाबाई यांनी आपला प्लॉट दुसऱ्या व्यक्तीला विकल्याच्या कारणावरून आरोपी श्रीकांत जाधव याने १० मे २०२५ रोजी सायंकाळी साडेसहा वाजण्याच्या सुमारास वाद घातला. यावेळी त्याने गमाबाई यांना शिवीगाळ करत लाथाबुक्क्यांनी आणि काठीने मारहाण केली व जीवे मारण्याची धमकी दिली.
या घटनेनंतर निर्मला जाधव यांनी ११ मे २०२५ रोजी नळदुर्ग पोलीस ठाण्यात धाव घेत श्रीकांत जाधव विरोधात तक्रार दाखल केली. त्यांच्या तक्रारीवरून पोलिसांनी भारतीय न्याय संहिता कलम ११८(१) (जीवघेणा हल्ला करण्याचा प्रयत्न), ११५(२) (धमकी देणे), ३५२ (मारहाण), आणि ३५१(२) (गुन्हेगारीसाठी दबाव आणणे) अन्वये गुन्हा नोंदवला आहे. या प्रकरणाचा पुढील तपास नळदुर्ग पोलीस करत आहेत.
