परांडा – महाराष्ट्र शासनाने प्रतिबंध घातलेला गुटखा आणि तत्सम तंबाखूजन्य पदार्थांची विक्री करणाऱ्या एका अल्पवयीन मुलावर परांडा पोलिसांनी कारवाई केली आहे. त्याच्याकडून सुमारे ५,४८८ रुपयांचा मुद्देमाल जप्त करण्यात आला असून, त्याच्याविरुद्ध गुन्हा दाखल करण्यात आला आहे. ही कारवाई गुरुवारी (दि. १० एप्रिल २०२५) सायंकाळी पावणेसहा वाजण्याच्या सुमारास परांडा शहरातील टिपू सुलतान चौकात करण्यात आली.
याप्रकरणी मंडई पेठ (ता. परांडा) येथे राहणाऱ्या एका विधीसंघर्षग्रस्त बालकावर (अल्पवयीन आरोपी) गुन्हा नोंदवण्यात आला आहे. परांडा पोलिसांना मिळालेल्या माहितीनुसार, टिपू सुलतान चौकातील ‘जावेद ट्रेडर्स’ नावाच्या दुकानातून प्रतिबंधित गुटख्याची विक्री केली जात होती.
या माहितीच्या आधारे पोलिसांनी गुरुवारी सायंकाळी दुकानावर छापा टाकला. त्यावेळी सदर अल्पवयीन मुलगा दुकानातून प्रतिबंधित गुटखा आणि तंबाखूजन्य पदार्थांची विक्री करताना रंगेहाथ आढळून आला. पोलिसांनी त्याच्या ताब्यातून रॉयल ७१७ तंबाखू (गुटख्यात मिसळण्यासाठी वापरली जाणारी), जाफरानी जर्दा झेड एल, हिरा पान मसाला यांचे पुडे तसेच एक आयटेल कंपनीचा मोबाईल असा एकूण ५ हजार ४८८ रुपये किमतीचा मुद्देमाल जप्त केला.
याप्रकरणी पोलिसांनी सरकारतर्फे फिर्याद देऊन विधीसंघर्षग्रस्त बालकाविरुद्ध भारतीय न्याय संहिता कलम १२३, २२३, २७५ सह अन्न सुरक्षा व मानके कायदा कलम ५९ अन्वये परांडा पोलीस ठाण्यात गुन्हा नोंदवला आहे. अल्पवयीन मुलांकडून अशा प्रतिबंधित पदार्थांची विक्री करून घेतली जात असल्याने चिंता व्यक्त होत असून, पोलीस या प्रकरणाचा अधिक तपास करत आहेत.
