शिराढोण – दि. २४ जुलै २०२४ रोजी दुपारी २ वाजता मुरुड ते ढोकी रोडवर एक भीषण अपघात झाला. या अपघातात मोटरसायकलस्वार ज्ञानेश्वर पंडीत शिंदे (२२ वर्षे, रा. खंडाळा) यांचा मृत्यू झाला तर हमीद नबी शेख (३३ वर्षे, रा. खंडाळा) हे गंभीर जखमी झाले.
अपघाताची माहिती अशी की, शिंदे आणि शेख हे मोटरसायकल क्र. एमएच २४ बीएम २०३५ वरून जात असताना समोरून येणाऱ्या टाटा कंपनीच्या छोट्या हत्ती क्र. एमएच २४ एफ ८४६६ ने त्यांना धडक दिली. हत्ती चालकाने निष्काळजीपणे रॉंग साईडने वाहन चालवल्यामुळे हा अपघात झाल्याचे सांगण्यात येते.
याप्रकरणी मयत ज्ञानेश्वर शिंदे यांचे वडील पंडीत अर्जुन शिंदे यांनी दिलेल्या फिर्यादीनुसार शिराढोण पोलीस ठाण्यात गुन्हा दाखल करण्यात आला आहे. हत्ती चालकाविरुद्ध भारतीय न्याय संहिता कलम 281, 106, 125(ए) सह 134 अ.ब., 184 मोवाका अन्वये गुन्हा नोंदवण्यात आला आहे.
