नेरूळ: साहित्य, संस्कृती आणि संतसाहित्य यांची समृद्ध परंपरा असलेल्या ‘मुक्त आनंदघन’ या नियतकालिकाचा ‘मन’ या विषयावरील दिवाळी अंक रविवारी नेरूळ येथे प्रकाशित करण्यात आला. मानसशास्त्रज्ञ डॉ. सुकुमार मुंजे, चित्रपटसृष्टीतील डॉ. धनंजय सावळकर, लेखक शिवाजी गावडे, कवी गजआनन म्हात्रे, जेष्ठ नागरिक संघाचे अध्यक्ष अरविंद वाळवेकर आणि सीबीआय अधिकारी संगीता बांगर यांच्या हस्ते हा अंक प्रकाशित झाला.
डॉ. देवीदास पोटे हे या अंकाचे मुख्य संपादक आहेत तर अजित आचार्य हे कार्यकारी संपादक आहेत. गेली पस्तीस वर्षे संत साहित्याला वाहिलेल्या या दिवाळी अंकाच्या प्रकाशनामागील भूमिका डॉ. पोटे यांनी यावेळी मांडली.
कार्यक्रमात डॉ. सुकुमार मुंजे यांनी अतीविचारांमुळे वाढणाऱ्या मानसिक ताणावर आणि त्यावरील ध्यानधारणेच्या उपायांवर भाष्य केले. डॉ. धनंजय सावळकर यांनी मन शांत करण्यासाठी विपश्यना आणि योगाची आवश्यकता प्रतिपादन केली. शिवाजी गावडे यांनी ‘मन’ या विषयावरील हा अंक माहितीपूर्ण, वाचनीय, संग्रहणीय आणि अभ्यासपूर्ण असल्याचे सांगितले.
या कार्यक्रमाला मुंबई उच्च न्यायालयाचे वकील ऍड. अभिमान पाटील, रायगडचे पशुसंवर्धन अधिकारी डॉ. रत्नाकर काळे, जीएसटीचे सह आयुक्त डॉ. शिवाजी पाटील, डॉ. केशव काळे, डॉ. अरुण गावडे, डॉ. मनोज माने, डॉ. सखाराम गारळे, हाजी शाहनवाज खान आणि इम्रान शेख आदी मान्यवर उपस्थित होते.कार्यक्रमाचे सूत्रसंचालन आणि माहितीपूर्ण निवेदन डॉ. वर्षा चौरे यांनी केले.
