नळदुर्ग – मुंबई-हैदराबाद राष्ट्रीय महामार्गावर नळदुर्गजवळील साई प्लाझा हॉटेलसमोर आज सकाळी एक भीषण अपघात झाला. भरधाव वेगात असलेल्या ट्रक आणि स्विफ्ट कारची समोरासमोर धडक होऊन झालेल्या या अपघातात कारमधील दोघांचा जागीच मृत्यू झाला, तर अन्य तिघे जण गंभीर जखमी झाले आहेत.
मिळालेल्या माहितीनुसार, आज सकाळी ७ वाजून २० मिनिटांच्या सुमारास हा अपघात घडला. हैदराबादकडून मुंबईच्या दिशेने जाणारा ट्रक (क्रमांक TS.13.UB.8676) आणि सोलापूरहून कर्नाटककडे जाणारी स्विफ्ट कार (क्रमांक KA.41.B.2600) यांची साई प्लाझा हॉटेलजवळ जोरदार धडक झाली. धडक इतकी भीषण होती की स्विफ्ट कारचा समोरील भागाचा पूर्णपणे चक्काचूर झाला.
या कारमधून एकूण पाच जण प्रवास करत होते. अपघातात दोघांचा मृत्यू झाला असून, तीन जण गंभीर जखमी झाले आहेत. जखमींमध्ये मल्लोर रामच कल्ला (वय २७) आणि गिरिजाप्पा जगन्नाथ शरणम्मा (वय ४०) यांचा समावेश असून, दोघेही गुलबर्गा, कर्नाटक येथील रहिवासी आहेत.
अपघाताची माहिती मिळताच नळदुर्ग येथील जगद्गुरु रामानंदाचार्य नरेंद्राचार्यजी संस्थानच्या रुग्णवाहिकेने तात्काळ घटनास्थळी धाव घेतली. रुग्णवाहिकेतील कर्मचाऱ्यांनी जखमींना तातडीने नळदुर्ग येथील उपजिल्हा रुग्णालयात उपचारासाठी दाखल केले. अपघातामुळे महामार्गावरील वाहतूक काही काळासाठी विस्कळीत झाली होती. या घटनेमुळे परिसरात हळहळ व्यक्त केली जात असून, नळदुर्ग पोलीस पुढील तपास करत आहेत.
