धाराशिव – लोहारा येथील एनएमएमएस (NMMS) परीक्षेत झालेल्या कथित मास कॉपी प्रकरणाची चौकशी करण्यासाठी जिल्हा परिषदेचे मुख्य कार्यकारी अधिकारी (CEO) डॉ. मैनाक घोष यांनी पाच सदस्यीय समिती नियुक्त केली असली तरी, समितीच्या रचनेवरून आता नवा वाद निर्माण झाला आहे. समितीत शिक्षण विभागाच्याच अधिकाऱ्यांचा समावेश असल्याने, ही चौकशी म्हणजे केवळ फार्स असून दोषींना वाचवण्याचा खटाटोप तर नाही ना, अशी शंका उपस्थित होत आहे. निष्पक्ष चौकशीसाठी अन्य विभागाच्या किंवा अन्य जिल्ह्यातील अधिकाऱ्यांची समिती नेमण्याची गरज व्यक्त होत आहे.
काय आहे नवा वाद?
राष्ट्रीय प्राथमिक शिक्षक महासंघाचे राष्ट्रीय उपाध्यक्ष बाळकृष्ण तांबारे यांनी लोहारा येथील वसंतदादा पाटील विद्यालयातील केंद्रावर मास कॉपी झाल्याची तक्रार केल्यानंतर, ‘धाराशिव लाइव्ह’ने सोमवारी यावर वृत्त प्रकाशित केले होते. त्याची दखल घेत CEO डॉ. घोष यांनी तातडीने चौकशी समिती नेमली. मात्र, या समितीचे अध्यक्षपद माध्यमिक शिक्षणाधिकारी सुधा साळुंखे यांच्याकडे असून, सदस्य म्हणून उपशिक्षणाधिकारी, उमरग्याचे गटशिक्षणाधिकारी आणि शिक्षण विस्तार अधिकारी यांचा समावेश आहे. हे सर्व अधिकारी शिक्षण विभागाशीच संबंधित आहेत.
हितसंबंधांचा संघर्ष?
शिक्षण विभागाच्याच अखत्यारीत होणाऱ्या परीक्षेतील गैरप्रकाराची चौकशी त्याच विभागाचे अधिकारी कितपत नि:पक्षपातीपणे करतील, असा प्रश्न उपस्थित होत आहे. विशेषतः, एनएमएमएस परीक्षेचे नियंत्रण आणि केंद्रसंचालनाची जबाबदारी तालुक्याच्या गटशिक्षणाधिकाऱ्यांकडे (BEO) असते. लोहारा केंद्रावर, जेथे ७२ विद्यार्थ्यांना समान गुण मिळाल्याचे समोर आले आहे, तेथील गटशिक्षणाधिकाऱ्यांच्याच नियंत्रणाखाली परीक्षा पार पडली. त्यामुळे आता शिक्षण विभागाच्याच समितीकडून आपल्याच अधिकाऱ्यांची चौकशी कितपत योग्य ठरेल, आणि दोषींना ‘क्लीन चिट’ दिली जाण्याची शक्यता नाकारता येत नाही, असे मत व्यक्त होत आहे.
अन्य विभागाचे/जिल्ह्याचे अधिकारी नेमा: शिक्षक महासंघ
“हे प्रकरण गंभीर असून शिक्षण क्षेत्रावर दूरगामी परिणाम करणारे आहे. त्यामुळे निष्पक्ष चौकशीसाठी समितीत शिक्षण विभाग वगळता अन्य विभागाचे किंवा शक्य असल्यास अन्य जिल्ह्यातील अधिकाऱ्यांचा समावेश अत्यावश्यक आहे,” अशी प्रतिक्रिया बाळकृष्ण तांबारे यांनी दिली आहे. या मागणीसाठी मंगळवारी (आज) CEO डॉ. घोष यांना भेटून निवेदन देणार असल्याचेही त्यांनी स्पष्ट केले.
आता सीईओ डॉ. मैनाक घोष शिक्षक महासंघाच्या मागणीवर काय भूमिका घेतात आणि समितीच्या रचनेत बदल करतात का, याकडे सर्वांचे लक्ष लागले आहे. समितीच्या अहवालाला आठ दिवसांची मुदत असली तरी, तिच्या रचनेवरील आक्षेपामुळे चौकशी सुरू होण्यापूर्वीच वादात सापडली आहे.
NMMS शिष्यवृत्ती परीक्षेत मास कॉपी प्रकरण: चौकशीसाठी पाच जणांची समिती नियुक्त
NMMS परीक्षेत लोहारा केंद्रावर सामूहिक कॉपीचा गंभीर आरोप
