परंडा – तालुक्यातील सरणवाडी शिवारात शेतीच्या जुन्या वादातून एका दाम्पत्याला गैरकायदेशीर जमाव जमवून शिवीगाळ करत काठीने व लाथाबुक्क्यांनी जबर मारहाण करण्यात आल्याची धक्कादायक घटना घडली आहे. इतकेच नव्हे तर, महिलेच्या अंगावर ट्रॅक्टर घालून जीवे मारण्याचा प्रयत्नही करण्यात आला. घटनेनंतर सुमारे अडीच महिन्यांनी याप्रकरणी परंडा पोलीस ठाण्यात सात जणांविरुद्ध गंभीर कलमांखाली गुन्हा नोंदविण्यात आला आहे.
पोलिसांकडून मिळालेल्या माहितीनुसार, अनिता बाळासाहेब होरे (वय ४२ वर्षे, रा. पिंपळवाडी, ता. परंडा) यांनी १२ एप्रिल २०२५ रोजी परंडा पोलीस ठाण्यात फिर्याद दिली आहे. त्यानुसार, ३० जानेवारी २०२५ रोजी दुपारी ४ वाजण्याच्या सुमारास सरणवाडी शिवारातील शेत गट नंबर १०० मध्ये फिर्यादी अनिता होरे व त्यांचे पती असताना ही घटना घडली.
आरोपी तानाजी सुखदेव सांगडे, रोहिण तानाजी सांगडे, शिवाजी सुखदेव सांगडे, सुखदेव एकनाथ सांगडे, महानंदा सुखदेव सांगडे (सर्व रा. सरणवाडी, ता. परंडा), संतोष दिगंबर होरे (रा. पिंपळवाडी, ता. परंडा) आणि अमोल काकडे (रा. ब्रम्हगाव, ता. परंडा) यांनी संगनमत करून गैरकायद्याची मंडळी जमवली. त्यांनी शेतीच्या वादाच्या कारणावरून फिर्यादी अनिता होरे व त्यांच्या पतीला शिवीगाळ केली. तसेच, लाथाबुक्क्यांनी आणि काठीने जबर मारहाण करून गंभीर जखमी केले.
यानंतरही आरोपी थांबले नाहीत, त्यांनी फिर्यादी अनिता होरे यांच्या अंगावर ट्रॅक्टर घालून त्यांना जीवे ठार मारण्याचा प्रयत्न केला आणि जीवे मारण्याची धमकी दिली, असे फिर्यादीत नमूद करण्यात आले आहे.
या फिर्यादीवरून परंडा पोलिसांनी सातही आरोपींविरुद्ध भारतीय न्याय संहितेच्या कलम १०९, ७४, ७६, ३२६ (एफ), ११८(१), ११५(२), ३५२, ३५१(२), १८९(२), १८९(३), १९१(२),(३), १९० अन्वये (प्राणघातक हल्ल्याचा प्रयत्न, गंभीर दुखापत, गैरकायदेशीर जमाव, धमकी देणे इत्यादी) गुन्हा नोंदवला आहे. पोलीस या प्रकरणाचा अधिक तपास करत आहेत.
