परंडा – चिंचपूर येथील एका बाप आणि मुलाला घराबाहेर बोलावून त्यांच्यावर कोयता, दगड आणि काठीने हल्ला करून गंभीर जखमी केल्याची घटना घडली आहे. याप्रकरणी एकाच कुटुंबातील चार सदस्य आणि अन्य एका व्यक्तीविरोधात आंबी पोलीस ठाण्यात गुन्हा दाखल करण्यात आला आहे.
याबाबत धनंजय कल्याण गायकवाड (वय ४०, रा. चिंचपूर बु.) यांनी फिर्याद दिली आहे. पोलिसांनी दिलेल्या माहितीनुसार, ९ जून २०२५ रोजी दुपारी दोनच्या सुमारास चिंचपूर येथे ही घटना घडली. आरोपी सोमनाथ जालिंदर गायकवाड, शोभा सोमनाथ गायकवाड, सचिन सोमनाथ गायकवाड, सुरज सोमनाथ गायकवाड (सर्व रा. चिंचपूर बु.) आणि त्यांच्या अन्य एका साथीदाराने गैरकायद्याची मंडळी जमवली.
त्यानंतर आरोपींनी फिर्यादी धनंजय गायकवाड आणि त्यांचे वडील कल्याण काशीनाथ गायकवाड यांना घराबाहेर बोलावले. तिथे त्यांना शिवीगाळ करत लाथाबुक्क्यांनी, कोयता, दगड आणि काठीने बेदम मारहाण केली. या हल्ल्यात दोघेही जखमी झाले. तसेच, आरोपींनी त्यांना जिवे ठार मारण्याची धमकीही दिली.
या घटनेनंतर धनंजय गायकवाड यांनी १६ जून रोजी आंबी पोलीस ठाण्यात फिर्याद दाखल केली. त्यांच्या तक्रारीवरून पोलिसांनी पाचही आरोपींविरुद्ध भारतीय न्याय संहिता कलम ११८, ११८(१), ११५(२), ३५२, ३५१(२)(३), १९१(१), १९१(२), १९० आणि आर्म्स ॲक्ट कलम ४/२५ अन्वये गुन्हा नोंदवला आहे. पुढील तपास आंबी पोलीस करत आहेत.
