परंडा : परंडा शहरातील एका ज्वेलर्सच्या दुकानात भरदिवसा चार अज्ञात महिलांनी हातचलाखी करत ८० हजार रुपये किमतीचे चांदीचे पैंजण चोरून नेल्याची खळबळजनक घटना उघडकीस आली आहे. या प्रकरणी परंडा पोलीस ठाण्यात त्या चार अज्ञात महिलांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, परंडा शहरातील बार्शी रोडवरील स्वाती समर्थ नगर येथे राहणारे फिर्यादी हिरालाल जनार्धन पेडगावकर (वय ६६) यांचे शहरात ‘समर्थ ज्वेलर्स खर्डेकर गोल्ड’ नावाचे सराफाचे दुकान आहे. गुरुवारी (दि. २६ मार्च) दुपारी १२.४० वाजेच्या सुमारास चार अनोळखी महिला त्यांच्या दुकानात आल्या.
या महिलांनी दागिने पाहण्याच्या बहाण्याने नजरचुकीचा फायदा घेत दुकानातील ६०० ग्रॅम वजनाचे पायातील चांदीच्या पैंजणाचे ७ जोड चोरून नेले. चोरीला गेलेल्या या चांदीच्या दागिन्यांची एकूण किंमत ८० हजार रुपये इतकी आहे. चोरीचा हा प्रकार नंतर लक्षात आल्यावर फिर्यादी यांना मोठा धक्का बसला.
या घटनेप्रकरणी हिरालाल पेडगावकर यांनी शुक्रवारी (दि. २७ मार्च) दिलेल्या प्रथम खबरीवरून परंडा पोलीस ठाण्यात त्या चार अज्ञात महिलांविरुद्ध भारतीय न्याय संहिता (BNS) कलम ३०३ (२), ३(५) अन्वये गुन्हा नोंदवण्यात आला आहे. भरदिवसा सराफाच्या दुकानात घुसून महिलांनी केलेल्या या चोरीमुळे शहरातील व्यापाऱ्यांमध्ये चिंतेचे वातावरण असून, परंडा पोलीस या महिला चोरट्यांचा कसून शोध घेत आहेत.
