भूम : कत्तलीच्या उद्देशाने गोवंशीय जनावरांची बेकायदेशीररीत्या आणि निर्दयीपणे वाहतूक करणारा एक पिकअप भूम पोलिसांनी पकडला आहे. या कारवाईत पोलिसांनी ४ जनावरांची सुटका केली असून, वाहनासह तब्बल ४ लाख रुपयांचा मुद्देमाल जप्त केला आहे. याप्रकरणी एका २१ वर्षीय तरुणावर भूम पोलीस ठाण्यात गुन्हा दाखल करण्यात आला आहे.
पोलिसांकडून मिळालेल्या माहितीनुसार, शुक्रवारी (दि. २७ मार्च) दुपारी १.४० वाजेच्या सुमारास पारडी घाटाच्या पायथ्याशी असलेल्या हिवरा येथील पुलावर ही कारवाई करण्यात आली. एक पिकअप (क्र. एमएच २३ एयु ०७५२) संशयास्पदरीत्या येताना पोलिसांना आढळला. या वाहनाची तपासणी केली असता, त्यात ४ गोवंशीय जातीची जनावरे अत्यंत दाटीवाटीने आणि निर्दयीपणे कोंबलेली असल्याचे दिसून आले.
चारा-पाण्याची कोणतीही व्यवस्था नाही:
या जनावरांसाठी चारा आणि पाण्याची कोणतीही व्यवस्था न करता, त्यांना केवळ कत्तलीच्या उद्देशाने बेकायदेशीररीत्या नेले जात असल्याचे पोलीस तपासात उघड झाले. या कारवाईत पोलिसांनी १ लाख रुपये किमतीची ४ जनावरे आणि गुन्ह्यासाठी वापरलेले वाहन असा एकूण ४,००,००० रुपयांचा मुद्देमाल जप्त केला आहे.
आरोपीवर गुन्हा दाखल:
याप्रकरणी पोलिसांनी पिकअप चालवणारा आरोपी जयवंत रमेश बरखडे (वय २१, रा. कुसुमनगर, भूम, ता. भूम, जि. धाराशिव) याला ताब्यात घेतले आहे. सरकारतर्फे देण्यात आलेल्या फिर्यादीवरून भूम पोलीस ठाण्यात आरोपीविरुद्ध प्राण्यांना क्रूरतेने वागवण्यास प्रतिबंध करणारा अधिनियम कलम ११(१) (ड) सह महाराष्ट्र पशु संरक्षण अधिनियम कलम ५(अ), ५(ब) आणि ९(ए) अन्वये गुन्हा नोंदवण्यात आला आहे. या घटनेचा पुढील तपास भूम पोलीस करत आहेत.
