कळंब : तालुक्यातील वाठवडा येथील निसर्ग लॉजवर वेश्या व्यवसाय चालवला जात असल्याची गुप्त माहिती मिळाल्यानंतर शिराढोण पोलिसांनी शुक्रवारी, दिनांक २० जून २०२५ रोजी छापा टाकला. या कारवाईत पोलिसांनी दोन पीडित महिलांची सुटका केली असून, लॉज मालक, दलाल आणि रिक्षा चालकासह एकूण चार आरोपींविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, वाठवडा येथील निसर्ग लॉजमध्ये काहीजण महिलांना पैशांचे आमिष दाखवून वेश्या व्यवसायासाठी प्रवृत्त करत असल्याची माहिती पोलिसांना मिळाली होती. या माहितीच्या आधारे पोलिसांनी सापळा रचून शुक्रवारी दुपारी ३:४० ते ५:४० च्या सुमारास निसर्ग लॉजवर छापा टाकला.
या कारवाई दरम्यान, आरोपी स्वतःच्या आर्थिक फायद्यासाठी दोन महिलांना लॉजवर आश्रय देऊन ग्राहकांच्या मागणीनुसार लैंगिक संबंध ठेवण्यास भाग पाडत असल्याचे उघड झाले. पोलिसांनी घटनास्थळावरून दोन पीडित महिलांची सुटका केली आहे.
याप्रकरणी पोलिसांनी लॉज मालक सय्यद शबीर बेग, त्याचा मुलगा तय्युन तय्यब बेग (वय २४), दलाल खय्युम शबीर बेग (वय ४८, रा. वाठवडा, ता. कळंब) आणि रिक्षाचालक नितीन शरद शिंदे (वय ३७, रा. दत्तनगर मुरुड, जि. लातूर) या चौघांविरुद्ध संगनमत करून गुन्हा केल्याचा आरोप ठेवला आहे.
सरकारतर्फे दिलेल्या फिर्यादीवरून शिराढोण पोलीस ठाण्यात आरोपींविरुद्ध भारतीय न्याय संहिता कलम १४३, १४४, ३(५) सह अनैतिक मानवी वाहतूक व व्यापार प्रतिबंध अधिनियम १९५६ च्या कलम ३, ४, ५, ६ अन्वये गुन्हा नोंदवण्यात आला आहे. या घटनेमुळे परिसरात खळबळ उडाली असून पोलीस पुढील तपास करत आहेत.
