धाराशिव: “कायदा आणि सुव्यवस्था” राखणाऱ्या पोलिसांनाच आता चोरांनी थेट आव्हान दिलंय! ‘पोलीस ठाण्यासमोर चोरी’ किंवा ‘पोलिसांच्या घरात चोरी’ अशा बातम्या तुम्ही ऐकल्या असतील, पण धाराशिवच्या भूममध्ये चोरांनी जे केलं, ते ऐकून तुमचेही डोळे पांढरे होतील. चक्क एका पोलीस कर्मचाऱ्याच्या गाडीतून भरदिवसा ४ लाख रुपयांची रोकड लंपास करण्यात आली आहे. या फिल्मी स्टाईल चोरीचा व्हिडिओ आता सोशल मीडियावर तुफान व्हायरल झालाय.
🚲 ‘पंचर’ प्लॅन आणि गेम ओव्हर!
वाशी पोलीस ठाण्यात कार्यरत असलेले पोलीस कर्मचारी अर्जुन मार्कड हे काही कामानिमित्त भूम शहरात आले होते. त्यांनी आपल्या दुचाकीच्या डिक्कीत ४ लाख रुपयांची रोख रक्कम ठेवली होती. पण, चोरांची नजर आधीपासूनच त्यांच्यावर होती.
चोरांनी चोरी करण्यासाठी अत्यंत ‘शार्प’ डोके चालवले. त्यांनी आधी शिताफीने पोलिसांच्या दुचाकीला पंचर केले. त्यानंतर पोलीस कर्मचाऱ्याचे लक्ष विचलित करून, डिक्की उघडून काही सेकंदांत ४ लाख रुपये घेऊन रफूचक्कर झाले.
🎥 कॅमेऱ्यात कैद झाला ‘कारनामा’
चोरांना वाटलं असेल आपण पोलिसाला मामा बनवून सहज निसटलो, पण त्यांचा हा सगळा कारनामा जवळच असलेल्या एका सीसीटीव्ही (CCTV) कॅमेऱ्यात कैद झाला आहे. या फुटेजमध्ये चोरटे किती हुशारीने दिशाभूल करत आहेत, हे स्पष्ट दिसत आहे. सध्या पोलीस याच फुटेजच्या आधारे चोरांचा माग काढत आहेत.
❓ ‘सॉरी’ पण सुरक्षा कुठेय? जनतेचा सवाल
या घटनेचा व्हिडिओ सोशल मीडियावर वाऱ्यासारखा पसरल्याने जिल्ह्यात एकच खळबळ उडाली आहे. नेटकरी आणि नागरिक आता एकच प्रश्न विचारत आहेत– “जर पोलीसच चोरांच्या ‘टार्गेट’वर असतील, तर सामान्य जनतेने कुणाकडे पाहायचे?” या धाडसी चोरीमुळे सध्या धाराशिव पोलिसांच्या कार्यपद्धतीवर मोठे प्रश्नचिन्ह निर्माण झाले आहे.
सध्या भूम पोलीस या प्रकरणाचा कसून तपास करत असून, “त्या” अट्टल चोरांच्या मुसक्या कधी आवळल्या जातात, याकडे सर्वांचे लक्ष लागले आहे.
