मुंबई/धाराशिव: राज्यातील ज्या नगरपरिषदा आणि नगरपंचायतींच्या सार्वत्रिक निवडणुकांबाबत जिल्हा न्यायालयात अपील दाखल करण्यात आले होते, अशा ठिकाणच्या निवडणूक प्रक्रियेत राज्य निवडणूक आयोगाने मोठा बदल केला आहे. आयोगाने अशा बाधित जागांसाठी सुधारित निवडणूक कार्यक्रम जाहीर केला असून, आता तेथे २० डिसेंबर २०२५ रोजी मतदान पार पडणार आहे.
राज्य निवडणूक आयोगाने ४ नोव्हेंबर २०२५ रोजी निवडणूक कार्यक्रम जाहीर केला होता. निवडणूक निर्णय अधिकाऱ्यांनी उमेदवारी अर्ज छाननीनंतर दिलेल्या निर्णयाविरोधात काही उमेदवारांनी जिल्हा न्यायालयात अपील दाखल केले होते. नियमानुसार, या अपीलांचा निकाल २२ नोव्हेंबरपर्यंत लागणे अपेक्षित होते, जेणेकरून उमेदवारांना अर्ज मागे घेण्यासाठी तीन दिवसांचा वैधानिक कालावधी मिळू शकला असता.
मात्र, काही ठिकाणी न्यायालयाचे निकाल उशिराने (२३ नोव्हेंबर किंवा त्यानंतर) लागले. तरीही संबंधित निवडणूक निर्णय अधिकाऱ्यांनी उमेदवारांना अर्ज मागे घेण्यासाठी पुरेसा वेळ न देताच २६ नोव्हेंबरला चिन्ह वाटप केले. ही प्रक्रिया नियमबाह्य ठरत असल्याने राज्य निवडणूक आयोगाने अशा विशिष्ट जागांची निवडणूक प्रक्रिया स्थगित करून नव्याने वेळापत्रक जाहीर केले आहे.
असा आहे सुधारित निवडणूक कार्यक्रम:
हा सुधारित कार्यक्रम फक्त अशाच जागांसाठी किंवा अध्यक्षपदासाठी लागू असेल, जिथे अपील दाखल होते आणि त्याचा निकाल २३ नोव्हेंबर २०२५ किंवा त्यानंतर लागला आहे.
-
जिल्हाधिकाऱ्यांनी निवडणूक कार्यक्रम जारी करणे: ०४ डिसेंबर २०२५
-
उमेदवारी अर्ज मागे घेण्याची अंतिम मुदत: १० डिसेंबर २०२५ (दुपारी ३ वाजेपर्यंत)
-
निवडणूक चिन्ह वाटप व अंतिम उमेदवारांची यादी: ११ डिसेंबर २०२५
-
मतदानाचा दिनांक: २० डिसेंबर २०२५ (सकाळी ७.३० ते सायं. ५.३०)
-
मतमोजणी व निकाल: २१ डिसेंबर २०२५ (सकाळी १० वाजता)
- आचारसंहिता लागू – जाहीर झालेल्या सुधारित कार्यक्रमानुसार संबंधित प्रभागासाठी (सदस्य पदासाठी) किंवा संपूर्ण शहरासाठी (अध्यक्ष पदासाठी) आचारसंहिता लागू झाली असून, ती निकाल जाहीर होईपर्यंत अंमलात राहील, असे राज्य निवडणूक आयोगाचे सचिव सुरेश काकाणी यांनी आदेशात स्पष्ट केले आहे.
