धाराशिव – शिवसेनेच्या महिला आघाडीच्या वतीने उपसभापती नीलम गोऱ्हे यांच्या उपस्थितीत आयोजित महिला मेळाव्यात एक गंभीर प्रकार उघड झाला आहे. संपूर्ण शहरात लावलेल्या बॅनर्सवरून शिवसेनेचे उपनेते आणि धाराशिवचे आमदार तानाजी सावंत यांचा फोटो पूर्णतः गायब होता.
जिल्ह्याचे माजी पालकमंत्री, एकमेव आमदार आणि पक्षाचे जेष्ठ नेते असूनही सावंत यांना पूर्णतः डावलल्याचं चित्र या प्रकारातून स्पष्टपणे दिसून आलं आहे. ही फक्त चूक आहे की हेतुपुरस्सर केलेला अवमान, असा सवाल आता उपस्थित होत आहे.
कार्यक्रमाच्या बॅनरवर सावंत यांचा फोटो नसल्याबाबत विचारले असता, काही स्थानिक कार्यकर्त्यांकडून “ते चुकून राहिले” असं कारण पुढे करण्यात आलं. मात्र, या पोकळ कारणावर विश्वास ठेवणं कठीण आहे.
नीलम गोऱ्हे यांनी “तानाजी सावंत हे आमचे जेष्ठ नेते असून त्यांनी चांगलं काम केलं आहे,” असं सांगत परिस्थिती सांभाळण्याचा प्रयत्न केला. मात्र, कार्यक्रम स्थळी यावरून मोठ्या प्रमाणावर चर्चा रंगली आणि सावंत समर्थकांत नाराजीचं वातावरण निर्माण झालं.
हा प्रकार केवळ एक चूक मानायचा की सावंत यांची गळचेपी करण्याचा सुरुवातीचा इशारा, हे पाहणं महत्त्वाचं ठरेल. जिल्हा स्तरावर याचे परिणाम होणार हे निश्चित आहे.
