तामलवाडी : गावात सुरू असलेल्या अनधिकृत बांधकामाबाबत विचारणा केली असता, त्याचा राग मनात धरून एका ३५ वर्षीय तरुणाला शिवीगाळ करत सिमेंटच्या विटेने मारहाण करून गंभीर जखमी केल्याची घटना तुळजापूर तालुक्यातील कदमवाडी येथे घडली आहे. याप्रकरणी तामलवाडी पोलीस ठाण्यात एकाविरुद्ध गुन्हा दाखल करण्यात आला आहे.
गोरख मच्छिंद्र मोरे (वय ३५ वर्षे, रा. कदमवाडी, ता. तुळजापूर, जि. धाराशिव) असे या मारहाणीत गंभीर जखमी झालेल्या फिर्यादीचे नाव आहे. तर इंद्रजित सूर्यभान कदम (रा. कदमवाडी) असे गुन्हा दाखल झालेल्या आरोपीचे नाव आहे.
पोलिसांनी दिलेल्या माहितीनुसार, १ मार्च २०२६ रोजी दुपारी २ वाजेच्या सुमारास कदमवाडी येथे आरोपी इंद्रजित कदम हा अनधिकृत बांधकाम करत होता. त्यावेळी फिर्यादी गोरख मोरे यांनी त्याला या बांधकामाबाबत विचारणा केली. याच गोष्टीचा राग आल्याने आरोपीने गोरख यांच्याशी वाद घालण्यास सुरुवात केली.
वाद वाढल्यानंतर आरोपीने गोरख मोरे यांना शिवीगाळ करत लाथाबुक्क्यांनी मारहाण केली. तसेच, रागाच्या भरात तिथे पडलेल्या सिमेंटच्या विटेने डोक्यावर/अंगावर मारहाण करून त्यांना गंभीर जखमी केले.
या घटनेनंतर जखमी गोरख मोरे यांनी शनिवारी (दि. ७ मार्च) तामलवाडी पोलीस ठाण्यात जाऊन प्रथम खबर दिली. त्यांच्या या तक्रारीवरून पोलिसांनी आरोपी इंद्रजित कदम याच्याविरुद्ध कलम ११८(२), ३५२ अन्वये गुन्हा नोंदवला आहे. या प्रकरणाचा पुढील तपास तामलवाडी पोलीस करत आहेत.
