धाराशिव: तामलवाडी पोलीस स्टेशनचे प्रभारी अधिकारी सुरज शांतीलाल देवकर (वय ३५, रा. बाळे, ता. उत्तर सोलापूर, जि. सोलापूर) यांना लाचलुचपत प्रतिबंधक विभागाने (ACB) ५०,००० रुपयांची लाच घेताना रंगेहाथ पकडले आहे.
देवकर यांनी एका २४ वर्षीय तरुणाविरुद्ध दाखल गुन्ह्यातून त्याचे नाव वगळण्यासाठी आणि त्याला अटक न करण्यासाठी १,००,००० रुपयांची लाच मागितली होती. तक्रारदाराने धाराशिव ACB कडे तक्रार दाखल केली. तक्रारदाराने दिलेल्या माहितीनुसार, देवकर यांच्या अधिपत्याखालील पोलीस अंमलदार या गुन्ह्याचा तपास करत होते.
ACB ने तक्रारीची पडताळणी १७ जानेवारी २०२५ रोजी केली. या पडताळणी दरम्यान, देवकर यांनी पंचासमक्ष १,००,००० रुपयांची लाच मागितली आणि पहिला हप्ता म्हणून ५०,००० रुपये स्वीकारण्याचे मान्य केले.
त्यानंतर, ACB ने सापळा रचला. देवकर यांनी आज, १७ जानेवारी २०२५ रोजी, पंचासमक्ष ५०,००० रुपये स्वीकारताना त्यांना रंगेहाथ पकडण्यात आले.
धाराशिव ACB युनिटचे पोलीस निरीक्षक नानासाहेब कदम (मो.नं. ९९२२२०७४९९) यांच्या नेतृत्वाखाली ही कारवाई करण्यात आली. पोलीस उपअधीक्षक सिद्धाराम म्हेत्रे (मो.नं. ९५९४६५८६८६) यांनी या कारवाईचे पर्यवेक्षण केले. या कारवाईत पोलीस अंमलदार सिध्देश्वर तावसकर, आशीष पाटील, विशाल डोके, शशिकांत हजारे यांचा समावेश होता.
लाचलुचपत प्रतिबंधक विभागाचे पोलीस अधीक्षक संदीप आटोळे (मो.नं. ९९२३०२३३६१) आणि अपर पोलीस अधीक्षक मुकुंद आघाव (मो.नं. ९८८१४६०१०४) यांनी या कारवाईचे मार्गदर्शन केले.
देवकर यांच्याविरुद्ध तामलवाडी पोलीस स्टेशनमध्ये गुन्हा दाखल करण्यात येत आहे.
नागरिकांना आवाहन: कोणत्याही शासकीय अधिकारी/कर्मचाऱ्याने लाचेची मागणी केल्यास तात्काळ ACB शी संपर्क साधावा, असे आवाहन करण्यात आले आहे.
संपर्क:
- अँन्टी करप्शन ब्युरो, धाराशिव
- दुरध्वनी क्रं. ०२४७२-२२२८७९
- टोल फ्रि क्रं. १०६४
