धाराशिव जिल्ह्यात चोरीच्या घटनांमध्ये वाढ होताना दिसत आहे. तामलवाडी पोलीस ठाणे हद्दीत इनरिच एनर्जी कंपनीच्या सोलार प्रकल्पातून 2 लाखांहून अधिक किमतीचा माल चोरीला गेल्याची घटना घडली आहे. तर धाराशिव शहर पोलीस ठाणे हद्दीत 25 हजार रुपये किमतीची मोटारसायकल चोरीला गेल्याची तक्रार दाखल झाली आहे.
तामलवाडी पोलीस ठाण्यात दाखल झालेल्या तक्रारीनुसार, 30 ऑगस्टच्या रात्री दहिवडी शिवारातील इनरिच एनर्जी कंपनीच्या सोलार प्रकल्पातून अज्ञात चोरट्यांनी केबल, वायर आणि कनेक्टर असा एकूण 2 लाख 7 हजार 610 रुपये किमतीचा माल चोरून नेला. कंपनीचे कर्मचारी तुकाराम राठोड यांनी याबाबत पोलिसात तक्रार दाखल केली आहे.
दुसरीकडे, धाराशिव शहरात राहणाऱ्या सुरेंद्रसिंग बगेल यांची 25 हजार रुपये किमतीची मोटारसायकल 31 ऑगस्टच्या रात्री रईस लेन गल्लीतून चोरीला गेली.
पोलिसांनी दोन्ही घटनांची नोंद घेत गुन्हे दाखल केले असून तपास सुरू केला आहे.
