धाराशिव : जिल्ह्यात भुरट्या चोरांचा सुळसुळाट वाढला असून उमरगा, लोहारा आणि परंडा पोलिस ठाण्याच्या हद्दीत चोरीच्या तीन वेगवेगळ्या घटना उघडकीस आल्या आहेत. यात दुचाकी, रोख रक्कम, मोबाईल आणि सोन्या-चांदीच्या दागिन्यांसह एकूण १ लाख २० हजार रुपयांचा मुद्देमाल चोरीला गेला आहे. या प्रकरणी संबंधित पोलिस ठाण्यांत अज्ञात चोरट्यांविरुद्ध भारतीय न्याय संहितेनुसार (भा.न्या.सं.) गुन्हे दाखल करण्यात आले आहेत.
उमरग्यातून दुचाकी लंपास
लातूर जिल्ह्यातील कासारशिरसी (ता. निलंगा) येथील अमित मनोज तुडुंम (वय २३) यांची दुचाकी उमरगा येथून चोरीला गेली. रविवारी (ता. १२) मध्यरात्री एक ते तीन वाजेच्या सुमारास त्यांनी आपली हिरो स्पलेंडर दुचाकी उमरगा येथील इनामदार हॉस्पिटलसमोर उभी केली होती. अज्ञात चोरट्यांनी गाडीचे कुलूप तोडून ४० हजार रुपये किमतीची दुचाकी चोरून नेली. या प्रकरणी अमित तुडुंम यांनी १३ एप्रिल रोजी दिलेल्या फिर्यादीवरून उमरगा पोलिस ठाण्यात भा.न्या.सं. कलम ३०३(२) नुसार गुन्हा दाखल करण्यात आला आहे.
मार्डी येथे घरात घुसून चोरी
दुसरी घटना लोहारा तालुक्यातील मार्डी येथे घडली. हिराचंद्र बाजीराव देवकर (वय ७१) हे घरात झोपले असताना, मंगळवारी (ता. १४) मध्यरात्री दोन ते अडीच वाजेच्या सुमारास अज्ञात चोरट्याने लाकडाच्या साहाय्याने त्यांच्या उशाजवळ ठेवलेली गेटची चावी काढली. या चावीने गेटचे कुलूप उघडून घरात प्रवेश करत चोरट्याने रोख रक्कम आणि मोबाईल असा एकूण ४० हजार रुपयांचा ऐवज चोरून नेला. याप्रकरणी लोहारा पोलिस ठाण्यात भा.न्या.सं. कलम ३३१(४), ३०५ अन्वये गुन्हा नोंदवण्यात आला आहे.
भांडगाव येथे दागिन्यांवर डल्ला
परंडा तालुक्यातील भांडगाव येथेही घरफोडीची घटना घडली. आशाबाई विलास अंधारे (वय ४७) यांच्या बंद घराचे कुलूप तोडून अज्ञात चोरट्यांनी घरात प्रवेश केला. सोमवार (ता. १३) सायंकाळी सात ते मंगळवार (ता. १४) सकाळी नऊ वाजेच्या दरम्यान चोरट्यांनी घरातील कपाट फोडून त्यातील सोने-चांदीचे दागिने असा एकूण ४० हजार रुपयांचा ऐवज लंपास केला. याप्रकरणी आशाबाई अंधारे यांच्या फिर्यादीवरून परंडा पोलिस ठाण्यात भा.न्या.सं. कलम ३३१(४), ३०५ (ए) नुसार गुन्हा दाखल करण्यात आला आहे.
