धाराशिव – रामलिंग अभयारण्यात आलेल्या वाघाने वनविभागाचे पथक आणि चंद्रपूरच्या रेस्क्यू टीमला चांगलाच गुंगारा दिला आहे. पाच दिवसांपासून वाघाचा पत्ता लागेना, आणि वनविभागाचे अधिकारी मात्र “पायाचे ठसे पाहू” म्हणून जंगल पालथे घालत आहेत. वाघ म्हणतोय, “मी वाघ आहे, गाडी नाही, GPS लावून शोधाल काय?”
वाघाच्या शोधात ५० अधिकारी आणि कर्मचारी दिवसरात्र झपाझप पायपीट करत आहेत. रामलिंग अभयारण्यातील २३०० हेक्टर जंगल पालथे घालून झालंय, पण वाघ मात्र “लपाछपीचा वर्ल्ड चॅम्पियन” असल्याचं सिद्ध करतोय.
बार्शी आणि धाराशिव तालुक्यातील गाय-वासरांना वाघाने टार्गेट केलं आहे. गाय-वासरांची परिस्थिती अशी की, “आमचं जीवावर आलंय, आणि वाघाचं जंगलात थ्रीडे टूर चालू आहे.”
शुक्रवारी उकडगावच्या परिसरात चार जनावरांवर वाघाने झडप घातली. मात्र, रेस्क्यू टीमच्या हाती फक्त पायांचे ठसे आलेत. आता हे ठसे बघून वाघाचा मूड समजायचा का, असा प्रश्न वनविभागाला पडलाय.
वन अधिकारी बी. ए. पोळ यांनी सांगितलं, “आम्ही वाघ सापडेपर्यंत थांबणार नाही, पण वाघाला हे सांगायला हवं की थोडं स्थिर बसावं, नाहीतर आम्ही जंगलातच हरवून जाऊ.”
वनविभागाच्या या वाघो-वाघो मोहिमेवर गावकऱ्यांनीही आपली मजा घेतली आहे. “वाघाला शोधण्याऐवजी त्याच्यासाठी पोस्टर छापून लावा,” असा भन्नाट सल्ला एका ग्रामस्थाने दिला. तर दुसऱ्याने विचारलं, “वाघाला WhatsApp लोकेशन पाठवायला सांगा की, सगळं सोप्पं होईल!”
आता वाघ सापडतो की वनविभागाचे धावपटू ऑलिम्पिकला निघतात, हे पाहणं औत्सुक्याचं ठरणार आहे.
