लोहारा – तोरंबा येथील ग्रामपंचायत कार्यालयात सामाईक बोर वापरण्याच्या वादातून एका ६० वर्षीय वृद्धाला मारहाण करण्यात आल्याची घटना १८ जानेवारी रोजी घडली आहे. याप्रकरणी लोहारा पोलीस ठाण्यात चार जणांविरुद्ध गुन्हा दाखल करण्यात आला आहे.
कमलाकर जगन बिराजदार (वय ६०, रा. तोरंबा) यांना रमेश जगन बिराजदार, तानाजी रतेश बिराजदार, उमेश बिराजदार आणि भिमाशंकर रमेश बिराजदार (सर्व रा. तोरंबा) यांनी सामाईक बोर वापरण्याच्या कारणावरून शिवीगाळ करत लाथाबुक्यांनी मारहाण केली. तसेच खिडकीची फुटलेली काच घेऊन त्यांना मारहाण करून जखमी केले. यावेळी आरोपींनी कमलाकर बिराजदार यांना जीवे मारण्याची धमकी दिली.
या घटनेची तक्रार कमलाकर बिराजदार यांनी १९ जानेवारी रोजी लोहारा पोलीस ठाण्यात दिली. त्यांच्या फिर्यादीवरून पोलिसांनी आरोपींविरुद्ध भादंवि कलम ११८(१), ११५(२), ३५२, ३५१(२), ३५१(३), ३(५) अन्वये गुन्हा दाखल केला आहे. पुढील तपास पोलीस करत आहेत.
