तुळजापूर: तालुक्यात फोफावलेल्या बोगस डॉक्टरांवर कारवाई करण्याच्या मागणीसाठी अनेक वर्षांपासून सुरू असलेल्या आंदोलनाकडे प्रशासन जाणीवपूर्वक दुर्लक्ष करत असल्याचा आरोप करत, अखिल भारतीय भ्रष्टाचार निर्मूलन संघर्ष समितीने आंदोलन तीव्र केले आहे. समितीचे जिल्हाध्यक्ष गणेश पाटील हे आज, २० जून रोजी तालुका आरोग्य अधिकारी कार्यालयासमोर आत्मदहन करणार असल्याचा इशारा त्यांनी दिला आहे.
प्रशासनाच्या आश्वासनांची पूर्तता नाही
अखिल भारतीय भ्रष्टाचार निर्मूलन संघर्ष समितीने दिलेल्या माहितीनुसार, तुळजापूर तालुक्यात वैद्यकीय पदवी नसलेले अनेक तथाकथित डॉक्टर दवाखाने थाटून बसले आहेत. हे बोगस डॉक्टर रुग्णांवर चुकीचे उपचार करून त्यांची आर्थिक फसवणूक करत आहेत आणि त्यांच्या जीविताशी खेळत आहेत. याविरोधात समितीने वेळोवेळी आवाज उठवून आंदोलने केली आहेत. प्रत्येक वेळी आरोग्य प्रशासनाने कारवाई करण्याचे लेखी आश्वासन दिले, मात्र प्रत्यक्षात कोणतीही ठोस कारवाई केली नाही, असा समितीचा आरोप आहे.
लैंगिक अत्याचाराच्या आरोपी डॉक्टरवर प्रशासनाचा वरदहस्त?
या आंदोलनामागची तीव्रता मंगरूळ येथील एका धक्कादायक घटनेमुळे वाढली आहे. येथील डॉ. राजेंद्र लबडे नावाच्या एका व्यक्तीवर बोगस दवाखाना चालवत असताना उपचारासाठी आलेल्या २४ वर्षीय तरुणीवर अत्याचार केल्याचा गंभीर गुन्हा दाखल आहे. मात्र, गुन्हा दाखल होऊनही हा डॉक्टर पुन्हा क्लिनिक चालवत असून, त्याला प्रशासनातील काही अधिकाऱ्यांचा आशीर्वाद असल्याचा गंभीर आरोप समितीने केला आहे.
या सर्व गंभीर प्रकारांवर प्रशासनाने तातडीने कारवाई न केल्यास, आज आत्मदहन अटळ आहे, असे समितीने म्हटले आहे. यासंदर्भात तालुका आरोग्य अधिकारी आणि जिल्हाधिकारी यांना लेखी निवेदन देण्यात आले असून, राष्ट्रीय अध्यक्ष प्रदीप बाबा खंडापूरकर यांच्या आदेशाने हा निर्णय घेण्यात आल्याचे पदाधिकाऱ्यांनी सांगितले.
