तुळजापूर – तुळजापूर शहरात बनावट कागदपत्रांच्या आधारे गुंठेवारी नियमित केल्याचे प्रकरण उघडकीस आले आहे. सर्वे नंबर २०७/२ मधील प्लॉट नंबर २८ ची गुंठेवारी बनावट असल्याचे निष्पन्न झाल्याने ती रद्द करण्यात आली असून, संबंधित प्लॉट मालक सुरज बंडू कानडे यांना नगरपालिकेने खुलासा सादर करण्यासाठी नोटीस बजावली आहे.
ॲड. अश्विनकुमार अरुणराव घोरपडे यांनी याप्रकरणी तक्रार दाखल केली होती (अर्ज क्र. ७२३३). त्यांच्या पाठपुराव्यानंतर हे प्रकरण समोर आले. उपअधिक्षक भूमी अभिलेख कार्यालयाने दिलेल्या माहितीनुसार, सदर प्लॉटची गुंठेवारीसाठी आवश्यक मोजणी झालेली नाही आणि त्यासाठी कोणताही अर्ज भूमी अभिलेख कार्यालयात प्राप्त झालेला नव्हता. नियम व अटींची पूर्तता होत नसल्याने भूमी अभिलेख कार्यालयाच्या संदर्भ क्र. ०१ अन्वये यापूर्वी केलेले नियमितीकरण रद्द करण्यात आले आहे.
आरोप आहे की, तत्कालीन मुख्याधिकारी लक्षमण कुंभार यांच्या कार्यकाळात, नगरपालिकेतील संबंधित अधिकाऱ्यांनी (विशेषतः नगररचना सहाय्यक श्रीमती मंगरूळे मॅडम यांच्यावर संशय व्यक्त होत आहे) अधिकाराचा दुरुपयोग करत बनावट कागदपत्रांच्या आधारे ही गुंठेवारी मंजूर केली. यामुळे जमिनीच्या खरेदी-विक्रीचा मार्ग मोकळा झाला होता.
नूतन मुख्याधिकारी अजिंक्य रणदिवे यांनी या प्रकरणी तातडीने कारवाई करत सुरज बंडू कानडे यांना नोटीस बजावली आहे. सात दिवसांच्या आत समाधानकारक खुलासा न आल्यास पुढील कारवाई करण्याचा इशारा दिला आहे.
दरम्यान, ॲड. घोरपडे यांनी नगररचना सहाय्यक श्रीमती मंगरूळे यांच्या कार्यकाळात अशा प्रकारे आणखी किती बोगस गुंठेवारी प्रकरणे झाली आहेत, याची माहिती नगर परिषदेकडे मागितली आहे. तसेच, या प्रकरणी संबंधित अधिकाऱ्यांवर जिल्हाधिकारी काय कारवाई करणार? असा सवालही त्यांनी उपस्थित केला आहे. या प्रकरणामुळे तुळजापूर नगरपालिकेच्या कारभारावर प्रश्नचिन्ह निर्माण झाले आहे.
