तुळजापूर – देवदर्शनासाठी मध्यरात्री तुळजापूरकडे निघालेल्या गिर कुटुंबावर काळाने घाला घातला. काक्रंबा – वडगाव लाख (ता. तुळजापूर) रस्त्यावर गुरुवारी मध्यरात्री दोनच्या सुमारास झालेल्या भीषण अपघातात चार वर्षाच्या बालकाचा मृत्यू झाला असून सात जण गंभीर जखमी झाले आहेत. ही दुर्दैवी घटना परिसरात हळहळ व्यक्त करणारी ठरली आहे.
लातूर जिल्ह्यातील औसा तालुक्यातील पोमादेवी जवळगा येथील गिर कुटुंब आपल्या खासगी मालवाहतूक टमटम (MH 24 AU 5381) मधून शिखर शिंगणापूर जाताना वाटेत तुळजाभवानी देवीच्या दर्शनासाठी निघाले होते. मात्र, वडगाव लाखजवळ चालकाचा ताबा सुटल्याने गाडी थेट रस्त्यालगत असलेल्या सिमेंट पुलाला धडकली. या भीषण धडकेत गाडीचा चक्काचूर झाला.
अपघातात अवधूत अमोल गिर (वय ४ वर्ष) या चिमुकल्याचा दुर्दैवी मृत्यू झाला असून जखमींमध्ये अमोल नरोत्तम गिर (३०), दुर्गा अमोल गिर (१९), जयश्री नरोत्तम गिर (४५), वैष्णव हणुमंत पुरी (३०), गीतांजली नरोत्तम गिर (३२), अद्विक अमोल गिर (२), व नरोत्तम प्रेम गिर (६२) यांचा समावेश आहे. सर्वजण पोमादेवी जवळगा (ता. औसा, जि. लातूर) येथील रहिवासी आहेत.
घटनास्थळी ग्रामस्थांनी तातडीने धाव घेत मदतकार्य सुरू केले. १०८ रुग्णवाहिका चालक जहीद पटले आणि डॉक्टर राऊत यांच्या मदतीने सर्व जखमींना तातडीने तुळजापूर उपजिल्हा रुग्णालयात दाखल करण्यात आले. पुढील उपचारासाठी सर्वांना धाराशिव जिल्हा रुग्णालयात हलवण्यात आले असून मृत बालकाचा मृतदेह तुळजापूर उपजिल्हा रुग्णालयात शवविच्छेदनासाठी ठेवण्यात आला आहे.
या अपघातात टमटमचेही मोठे नुकसान झाले आहे. देवदर्शनासाठी निघालेल्या एका कुटुंबाच्या आनंद यात्रेचे शोकांतिका होऊन संपूर्ण परिसरात हळहळ व्यक्त होत आहे.
व्हिडीओ पाहा
