धाराशिव : जिल्ह्यात गुन्हेगारीच्या घटनांमध्ये वाढ झाली असून, वाशी येथे भरदिवसा गाडीत आराम करणाऱ्या व्यक्तीच्या गळ्यातील सोनसाखळी हिसकावण्यात आली आहे, तर भूम आणि लोहारा येथून दोन मोटारसायकली चोरीला गेल्या आहेत. यासोबतच तामलवाडी परिसरातून शेतकऱ्याचा सौर कृषीपंप मोटर चोरट्यांनी लंपास केला आहे. या सर्व घटनांप्रकरणी संबंधित पोलीस ठाण्यांमध्ये गुन्हे दाखल करण्यात आले आहेत.
वाशीत सोनसाखळी हिसकावली
वाशी तालुक्यातील बोरी फाटा येथे एक धक्कादायक घटना घडली आहे. बीड येथील रहिवासी असलेले बालासाहेब प्रकाशराव पोपळे (वय ३९) हे दिनांक २९ मे २०२५ रोजी सकाळी ७ वाजण्याच्या सुमारास आपल्या गाडीमध्ये आराम करत होते. यावेळी चार अज्ञात व्यक्तींनी त्यांच्या गाडीजवळ येऊन त्यांच्या गळ्यातील चार तोळ्यांची सोन्याची चैन जबरदस्तीने हिसकावून पोबारा केला. याप्रकरणी बालासाहेब पोपळे यांनी दिलेल्या फिर्यादीवरून वाशी पोलीस ठाण्यात भारतीय न्याय संहितेच्या कलम ३०४(२) आणि ३(५) नुसार गुन्हा नोंदवण्यात आला असून पोलीस पुढील तपास करत आहेत.
भूम आणि लोहारा येथून मोटारसायकल चोरी
- भूम: येथील कोष्टीगल्लीत राहणारे ज्ञानेश्वर दत्तात्रय आसलकर (वय ५१) यांची हिरो होंडा मोटारसायकल (क्र. एमएच २५ एएन ३१९३) दिनांक २४ मे रोजी रात्री ते २५ मे रोजी सकाळच्या दरम्यान त्यांच्या घरासमोरून चोरीला गेली. या मोटारसायकलची किंमत अंदाजे २०,००० रुपये आहे. याप्रकरणी भूम पोलीस ठाण्यात भारतीय न्याय संहितेच्या कलम ३०३(२) नुसार गुन्हा दाखल झाला आहे.
- लोहारा: कानेगाव येथील रहिवासी पंकज बापुराव बोकडे (वय २९) यांची ३५,००० रुपये किमतीची हिरो एचएफ डिलक्स मोटारसायकल (क्र. एमएच २५ एए ४७०२) दिनांक २३ मे रोजी सकाळी ११ वाजण्याच्या सुमारास लोहारा येथील महाराष्ट्र बँकेसमोरून अज्ञात चोराने चोरून नेली. याप्रकरणी लोहारा पोलीस ठाण्यात भारतीय न्याय संहितेच्या कलम ३०३(२) नुसार गुन्हा नोंदवण्यात आला आहे.
तामलवाडीत सौर कृषीपंप मोटरची चोरी
तुळजापूर तालुक्यातील धोत्री येथील शेतकरी रामा जगन्नाथ उबाळे (वय ५०) यांच्या शेतातील सौर कृषीपंपाची मोटर चोरीला गेली आहे. धोत्री शिवारातील गट नं. ३५४ मधील विहिरीवर बसवलेली अंदाजे ८,००० रुपये किमतीची ही मोटर दिनांक २७ मे ते २८ मे दरम्यानच्या काळात अज्ञात व्यक्तीने चोरून नेली. याप्रकरणी रामा उबाळे यांनी दिलेल्या फिर्यादीवरून तामलवाडी पोलीस ठाण्यात भारतीय न्याय संहितेच्या कलम ३०३(२) नुसार गुन्हा दाखल करण्यात आला आहे.
या सर्व घटनांमुळे परिसरात भीतीचे वातावरण असून, पोलीस आरोपींचा शोध घेत आहेत.
