विधानसभेची निवडणूक नोव्हेंबर महिन्यात होणार आहे , पण तुळजापूर मतदारसंघात पावसाळ्याच्या काळात सुद्धा धुराळा उडाला आहे. इथे सध्या सगळे ‘गुडघ्याला बाशिंग’ बांधून बसले आहेत. भाजपचे विद्यमान आमदार राणा जगजीतसिंह पाटील यांच्या विरोधात त्यांच्याच पक्षातले ऍड. व्यंकट गुंड ‘बंडखोरीचा आवाज’ बुलंद करीत आहेत. हे गुंड, पक्ष बदलण्याचं काम करताना निःसंकोच चार वेळा बदल केलेले आहेत. म्हणजे काँग्रेस, राष्ट्रवादी, आणि पुन्हा काँग्रेस असं फेऱ्यांवर फेऱ्या मारत आहेत. नुकतेच काँग्रेस नेते अमित देशमुख यांना भेटून म्हणाले, “साहेब, आणखी एकदा वळलो तर चालेल का?” देशमुख यांनी हसून म्हणलं, “अरे, पक्षाचं लॉयल्टी प्रोग्राम तर संपला ना! पण बघू पुढचं.”
दरम्यान, काँग्रेसचे जेष्ठ नेते, वयोमानानुसार माजी असावेत असा आग्रह धरणारे ९० वर्षांचे मधुकरराव चव्हाण हे चक्क ‘आता शेवटची लढाई’ म्हणत पुन्हा धोतर आवळून उभे राहिले आहेत. मतदारांनी २०१९ मध्येच ‘रिटायरमेंट’ दिलं होतं, पण शेवटचा चान्स म्हणत पुन्हा मैदानात उतरण्याचं ठरवलंय. काँग्रेसचे जिल्हाध्यक्ष ऍड. धीरज पाटील यांनी मात्र आता थेट विरोध उघड केला आहे. “चव्हाण साहेबांना घरी बसवा, मला सीट द्या,” अशी त्यांनी थेट मागणी केली आहे.
महाविकास आघाडीमध्ये काँग्रेसला तुळजापूरची सीट जाणार हे माहीत असूनही राष्ट्रवादीच्या शरद पवार गटाचे तिघेजण देव पाण्यात ठेवून बसलेत—अशोक जगदाळे, जीवनराव गोरे, आणि सक्षणा सलगर. तिघांनाही उमेदवारीची संधी मिळेल की नाही यावर त्यांची धास्ती आहे, पण अशोक जगदाळे यांची मात्र तयारी आहे—नव्हे उमेदवारी न मिळाली तर वंचित आघाडीचं दार लावायला तयार आहेत.
आणि मग नेहमीप्रमाणे देवानंद रोचकरी! किमान २५ ते ३० हजार मतं दर निवडणुकीत मिळवणारे हे साहेब अपक्ष म्हणून पुन्हा उतरणार हे नक्की! गेल्या वेळेस भाऊ शांत होते, पण यंदा मात्र त्यांचा ‘शांतता भंग’ होईल अशी शक्यता आहे.
हे सगळं पुरेसं नसलं तर हगलूरचे आण्णासाहेब दराडे यांनी तुळजापूरचा तालुका चक्क पिंजून काढलाय, अभिनव आंदोलन करत त्यांनी मतदारांचे लक्ष वेधून घेतलंय. आता रिंगणात उडी मारण्याची त्यांच्या फडाची घोषणा काहीही बोलत आहे.
एकंदरीत, तुळजापूर मतदारसंघात सध्या २५-३० उमेदवारांचं रिंगण रंगणार आहे. मतदार मात्र हवालदिल झालाय—कुणाला मत द्यावं, धुराळा इतका उठलाय की समजायला मार्ग नाही!
– बोरूबहाद्दर
