तुळजापूर: “एरवी पोलीस ठाण्यात गुन्हेगारांना पोलिसांचा ‘खाक्या’ दाखवला जातो, पण तुळजापूर पोलीस ठाण्यात चक्क आपल्याच सहकाऱ्यांना ग्रुपमधून ‘बाहेरचा रस्ता’ दाखवण्यात आला आहे! साहेबांच्या ‘हलक्या काना’मुळे आणि खाजगी ‘वसूलदारा’च्या अतिउत्साहामुळे सध्या तुळजापूर पोलिसांच्या व्हॉट्सॲप ग्रुपवर एक आगळावेगळा ‘डिजिटल सर्जिकल स्ट्राईक’ पाहायला मिळाला आहे.
झाले असे की, तुळजापूर पोलीस स्टेशनच्या अधिकृत व्हॉट्सॲप ग्रुपवर दररोजचे अपडेट्स पडत असतात. पण गेल्या महिन्यात अचानक या ग्रुपमधील वातावरण तापले. पोलीस निरीक्षकांचे (PI) लाडके आणि विश्वासू ‘वसूलदार’ (जे अधिकृत पोलीस कमी आणि साहेबांचे पीए जास्त वाटतात) यांनी एका सपोनि (API) आणि एका हेड कॉन्स्टेबलला ग्रुपमधून तडकाफडकी ‘रिमूव्ह’ (Remove) केले.
कारण विचाराल तर अधिकृत काहीच नाही! पण पोलीस ठाण्याच्या कट्ट्यावर जी कुजबूज आहे, त्यानुसार साहेबांना शंका होती की हे दोघे ‘घरचे भेदी’ आहेत. म्हणजे ठाण्यातील आतल्या बातम्या हे स्थानिक पत्रकारांना पुरवतात, असा संशय! साहेबांचे कान कच्चे असल्याने त्यांनी शहानिशा न करता या दोघांचा “डिजिटल एन्काऊंटर” करण्याचे आदेश दिले आणि वसूलदाराने ‘रिमूव्ह’ बटण दाबून कामगिरी फत्ते केली.
पण ज्यांना काढले, ते काही साधे सुधे नव्हते. त्यांनी थेट “आम्ही ग्रुपमधून लेफ्ट झालो नाही, तर आम्हाला काढले!” अशी तक्रार घेऊन पोलीस अधीक्षक (SP) मॅडमचे दार ठोठावले. आता हे प्रकरण साध्या व्हॉट्सॲप ग्रुपवरून थेट चौकशीच्या फेऱ्यात अडकले आहे.
या प्रकरणाची चौकशी धाराशिवच्या उपविभागीय पोलीस अधिकाऱ्यांकडे (SDPO) सोपवण्यात आली आहे. येत्या दोन दिवसात तुळजापूरचे ‘कानाचे कच्चे’ पोलीस निरीक्षक आणि त्यांचे ‘डिजिटल’ वारसदार (वसूलदार) यांचा जबाब नोंदवला जाणार आहे.
आता या “रिमूव्ह प्रकरणामुळे” कोणाची खुर्ची हालणार आणि कोणाला पुन्हा ग्रुपमध्ये ‘ॲड’ केले जाणार, याकडे संपूर्ण तुळजापूरचे आणि पत्रकारांचे लक्ष लागले आहे.
