उमरगा – जमिनीच्या वाटणीच्या कारणावरून झालेल्या वादात एकाच कुटुंबातील सात जणांनी मिळून दुसऱ्या गटातील पाच जणांना जबर मारहाण केल्याची धक्कादायक घटना उमरगा तालुक्यातील गुंजोटीवाडी येथे घडली आहे. पीडित कुटुंबाला शिवीगाळ करत, काठीने आणि लाथाबुक्क्यांनी मारहाण करून जखमी करण्यात आले व जीवे मारण्याची धमकीही देण्यात आली. याप्रकरणी उमरगा पोलीस ठाण्यात सात जणांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, ही घटना बुधवारी, दि. १८ जून २०२५ रोजी सकाळी आठ वाजण्याच्या सुमारास गुंजोटीवाडी शिवारातील गट नं. १७/३ आणि १८/२ येथे घडली. फिर्यादी महादेव दिनकर माशाळे (वय २४ वर्षे) हे त्यांचे आई-वडील आणि दोन बहिणींसोबत असताना आरोपींनी त्यांना गाठले. शेतजमिनीच्या वाटणीच्या जुन्या कारणावरून आरोपींनी गैरकायद्याची मंडळी जमवून महादेव आणि त्यांच्या कुटुंबीयांसोबत वाद घालण्यास सुरुवात केली.
या वादाचे रूपांतर हाणामारीत झाले. आरोपी कमलाकर माशाळे, प्रभाकर माशाळे, कृष्णा कमलाकर मासाळे, गोपाळ कमलाकर मासाळे, आर्जुन प्रभाकर मासाळे, ईश्वर प्रभाकर मासाळे आणि शोभा कमलाकर मासाळे यांनी फिर्यादी व त्यांच्या कुटुंबीयांना शिवीगाळ करत काठीने व लाथाबुक्क्यांनी मारहाण केली.
या हल्ल्यात फिर्यादीचे कुटुंब जखमी झाले असून, त्यांना जीवे मारण्याची धमकी देण्यात आल्याचे महादेव माशाळे यांनी आपल्या तक्रारीत म्हटले आहे. त्यांच्या फिर्यादीवरून उमरगा पोलिसांनी सातही आरोपींविरोधात भारतीय न्याय संहितेच्या विविध कलमांन्वये गुन्हा नोंदवला असून, पुढील तपास सुरू केला आहे.
