उमरगा : उमरगा तालुक्यातील गुंजोटवाडी येथे सरकारी जमिनीची मोजणी करणाऱ्या महिला तलाठ्याला धमकावून आणि शिवीगाळ करून शासकीय कामात अडथळा आणल्याची घटना घडली आहे. इतकेच नव्हे तर, आरोपींपैकी एका महिलेने मोजणीसाठी वापरण्यात येणारा दगड स्वतःच्या कपाळावर मारून जखमी करून घेत गोंधळ घालण्याचा प्रयत्न केला.
याप्रकरणी महिला तलाठी सुमैय्या इब्राहिम बागवान (वय २८) यांनी दिलेल्या फिर्यादीवरून उमरगा पोलीस ठाण्यात दोघांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, तलाठी सुमैय्या बागवान या २५ जून रोजी दुपारी पावणेदोनच्या सुमारास गुंजोटवाडी येथील सरकारी गायरान जमीन गट क्रमांक १४ मध्ये मोजणी करून हद्दीच्या खुणा निश्चित करण्याचे शासकीय काम करत होत्या. यावेळी तेथील रहिवासी असलेले आरोपी प्रेम दत्ता माने आणि बेबी दत्ता माने यांनी संगनमत करून कामात अडथळा आणला.
“तुम्ही येथून रस्ता मोकळा करून दिला, तर आम्ही आमच्या जिवाचे बरेवाईट करून घेऊ,” अशी धमकी देत आरोपींनी तलाठी बागवान यांना शिवीगाळ केली. यानंतर आरोपी बेबी माने यांनी मोजणीसाठी हद्दीची खूण म्हणून ठेवलेला दगड उचलून स्वतःच्या कपाळावर मारून घेतला आणि स्वतःला जखमी केले.
घडलेल्या प्रकारानंतर तलाठी सुमैय्या बागवान यांनी उमरगा पोलीस ठाण्यात तक्रार दाखल केली. त्यांच्या तक्रारीवरून पोलिसांनी प्रेम माने आणि बेबी माने यांच्यावर भारतीय न्याय संहितेच्या विविध कलमांनुसार शासकीय कामात अडथळा आणणे, धमकी देणे, आणि स्वतः जखमी होण्यास कारणीभूत ठरल्याप्रकरणी गुन्हा नोंदवला आहे. पुढील तपास पोलीस करत आहेत.
