वाशी: वाशी तालुक्यातील विजोरा शिवारात सार्वजनिक शांतता भंग करण्याच्या आणि लोकांच्या जीवितास धोका निर्माण करण्याच्या उद्देशाने विनापरवाना बेकायदेशीररित्या धारदार तलवार बाळगणाऱ्या एका २५ वर्षीय तरुणाला वाशी पोलिसांनी रंगेहात पकडले आहे. पोलिसांच्या पथकाने शेतातील पत्राच्या शेड शेजारी असलेल्या कडब्याच्या पेंढ्याखालून ही तलवार जप्त केली असून, आरोपीविरुद्ध शस्त्र कायद्यांतर्गत गुन्हा दाखल केला आहे.
संकेत हरिभाऊ सुकाळे (वय २५, रा. विजोरा, ता. वाशी, जि. धाराशिव) असे अटक करण्यात आलेल्या संशयित आरोपीचे नाव आहे. याप्रकरणी वाशी पोलीस ठाण्याचे पोलीस नाईक बाळासाहेब औताडे यांनी सरकारतर्फे फिर्याद दिली आहे.
कडब्याच्या पेंढ्याखाली लपवून ठेवली होती तलवार
वाशी पोलीस ठाण्याचे पथक शनिवार, दि. ३० मे रोजी रात्रीच्या सुमारास हद्दीत कायदा व सुव्यवस्था राखण्यासाठी आणि गुन्हेगारांचा बंदोबस्त करण्यासाठी पेट्रोलिंग करत होते. यादरम्यान रात्री ११ वाजेच्या सुमारास विजोरा शिवारातील एका शेतात बेकायदेशीर घातक शस्त्र लपवून ठेवल्याची खात्रीशीर माहिती पोलिसांना मिळाली. या माहितीच्या आधारे वाशी पोलिसांनी विजोरा शिवारातील संकेत सुकाळे याच्या शेतात अचानक छापा टाकला.
शस्त्र कायद्यान्वये गुन्हा नोंद
पोलिसांनी शेतातील पत्राच्या शेडची आणि आसपासच्या परिसराची कसून झडती घेतली. यावेळी पत्राच्या शेडच्या शेजारी असलेल्या कडब्याच्या पेंढ्याखाली लपवून ठेवलेली सुमारे १,५०० रुपये किमतीची एक मोठी लोखंडी धारदार तलवार पोलिसांच्या हाती लागली. कोणतीही परवानगी नसताना लोकांमध्ये दहशत निर्माण होईल अशा पद्धतीने हे घातक शस्त्र बाळगल्याप्रकरणी पोलिसांनी तलवार जप्त करून आरोपीला ताब्यात घेतले.
वाशी पोलिसांत गुन्हा दाखल
या धडक कारवाईनंतर फिर्यादी पोलीस नाईक बाळासाहेब औताडे यांच्या प्रथम खबरीवरून (FIR) आरोपी संकेत हरिभाऊ सुकाळे याच्याविरुद्ध वाशी पोलीस ठाण्यात ‘शस्त्र कायदा’ (Arms Act) कलम ४ आणि २५ अन्वये गुन्हा नोंदवण्यात आला आहे. या प्रकरणाचा पुढील तपास वाशी पोलीस करत आहेत.
