येरमाळा : बीड-सोलापूर राष्ट्रीय महामार्गावर (NH 52) रत्नापूर पाटीजवळ ऑटो रिक्षातून प्रवास करणाऱ्या एका महिलेच्या गळ्यातील ५४ हजार रुपये किमतीची सोन्याची चैन दोन अज्ञात मोटरसायकलस्वारांनी भरदिवसा हिसकावून नेल्याची घटना घडली आहे. ही घटना बुधवारी (दि. ९ एप्रिल २०२५) दुपारी साडेबारा वाजण्याच्या सुमारास घडली.
याप्रकरणी प्रिती रामराव जाधवर (वय २६ वर्षे, रा. वडजी, ता. वाशी, जि. धाराशिव) यांनी गुरुवारी (दि. १० एप्रिल २०२५) येरमाळा पोलीस ठाण्यात फिर्याद दिली आहे. फिर्यादीनुसार, प्रिती जाधवर या बुधवारी दुपारी बीड-सोलापूर महामार्गावरील रत्नापूर पाटीजवळ असलेल्या पांडुरंग हॉटेलसमोरून येरमाळ्याकडे जाणाऱ्या रस्त्यावरून ऑटो रिक्षाने (क्र. एमएच २५ एम १३८३) प्रवास करत होत्या.
त्याचवेळी, मागून एका मोटरसायकलवर आलेल्या दोन अज्ञात इसमांनी त्यांच्या रिक्षाजवळ येऊन प्रिती यांच्या गळ्यातील १८ ग्रॅम वजनाची, अंदाजे ५४,००० रुपये किमतीची सोन्याची चैन जबरदस्तीने हिसकावली आणि वेगाने पसार झाले. हा सर्व प्रकार इतक्या वेगात घडला की आरोपींचा चेहरा किंवा गाडीचा क्रमांक त्यांना पाहता आला नाही.
प्रिती जाधवर यांनी दिलेल्या फिर्यादीवरून येरमाळा पोलिसांनी दोन अज्ञात चोरट्यांविरुद्ध भारतीय न्याय संहितेच्या कलम ३०९(४) आणि ३(५) अन्वये गुन्हा नोंदवला आहे. भरदिवसा वर्दळीच्या रस्त्यावर झालेल्या या सोनसाखळी चोरीमुळे परिसरात भीतीचे वातावरण पसरले असून, पोलीस आरोपींचा शोध घेत आहेत.
