येरमाळा – वडजी गावात राहणाऱ्या बाहुबाई निवृत्ती जाधवर (वय ५२) यांना कोर्टाची नोटीस पाठवल्याच्या कारणावरून पल्लवी विशाल जाधवर, पोपट हांगे, सिता हांगे, फुलचंद बाबासाहेब हांगे, चंदु सुभानराव हांगे, नितीन आक्रुड हांगे, पोपट हांगे, गणेश हांगे, भागाबाई हांगे, सुदामती हांगे, बाळासाहेब हांगे, योगेश उर्फ गजानन हांगे, रोहीत हांगे, किशोर हांगे सर्व रा. हांगेवाडी ता. केज जि. बीड, बबन ढाकणे रा. ढाकणेवाडी ता. केज जि. धाराशिव व इतर १५ जणांनी एकत्र येऊन मारहाण केल्याची घटना ९ डिसेंबर रोजी घडली.
याप्रकरणी बाहुबाई जाधवर यांनी येरमाळा पोलीस ठाण्यात दिलेल्या फिर्यादीत म्हटले आहे की, आरोपींनी त्यांना शिवीगाळ करून लाथाबुक्यांनी व दगडाने मारहाण केली. तसेच त्यांचा मुलगा विशाल जाधवर यालाही शिवीगाळ करून मारहाण करण्यात आली. जिवे मारण्याची धमकीही देण्यात आली.
याप्रकरणी पोलिसांनी पल्लवी जाधवरसह २७ जणांविरुद्ध भादंवि कलम ११८(१), ११५(२), ३५२, ३५१(२), ३५१(३), १८९(२), १९१(१), १९० अन्वये गुन्हा दाखल केला आहे. पुढील तपास पोलीस करत आहेत.
वाटेफळ येथे शेतात पाणी मारण्याच्या कारणावरून मारहाण, गुन्हा दाखल
आंबी: वाटेफळ येथील शेतजमिनीवर पाणी मारण्याच्या कारणावरून झालेल्या वादातून एका वृद्ध महिलेला मारहाण करण्यात आल्याची घटना घडली आहे. याप्रकरणी आंबी पोलीस ठाण्यात तीन जणांविरुद्ध गुन्हा दाखल करण्यात आला आहे.
सावित्रा हनुमंत भांडवलकर (वय ६०, रा. वाटेफळ) यांनी दिलेल्या फिर्यादीनुसार, ३ डिसेंबर २०२४ रोजी दुपारी ४.३० वाजण्याच्या सुमारास वाटेफळ शिवारातील त्यांच्या शेतात पिकाला पाणी देत असताना शिवाजी भगवान भांडवलकर, संगीता शिवाजी भांडवलकर आणि विशाल शिवाजी भांडवलकर (सर्व रा. वाटेफळ) यांनी त्यांना शिवीगाळ करून लाथाबुक्यांनी मारहाण केली. तसेच दगडाने मारहाण करून ढकलून दिल्याने सावित्रा भांडवलकर यांचा डावा हात फ्रॅक्चर झाला. याशिवाय हनुमंत भांडवलकर यांनाही शिवीगाळ करून लाथाबुक्यांनी मारहाण करून जिवे मारण्याची धमकी देण्यात आली.
याप्रकरणी सावित्रा भांडवलकर यांनी ११ डिसेंबर २०२४ रोजी आंबी पोलीस ठाण्यात फिर्याद दिली. त्यांच्या फिर्यादीवरून पोलिसांनी शिवाजी भांडवलकर, संगीता भांडवलकर आणि विशाल भांडवलकर या तिघांविरुद्ध भादंवि कलम १२५(ब), ११८(१), ११५, ३५२, ३५१(२), ३५१(३), ३(५) अन्वये गुन्हा दाखल केला आहे.
