येरमाळ्यात शेतीच्या वादातून अ‍ॅट्रॉसिटीचा गुन्हा; भाऊ-बहिणीला लोखंडी पाईपने बेदम मारहाण करत दिली जीवे मारण्याची धमकी

येरमाळा: कळंब तालुक्यातील येरमाळा शिवारात शेतजमिनीच्या वादातून एका २५ वर्षीय तरुणाला आणि त्याच्या बहिणीला जातीवाचक शिवीगाळ करत लोखंडी पाईपने व लाथाबुक्क्यांनी बेदम मारहाण केल्याची धक्कादायक घटना समोर आली आहे. या हिंसक हल्ल्यात भाऊ-बहीण दोघेही गंभीर जखमी झाले असून, आरोपींनी त्यांच्या मोटरसायकलचेही नुकसान केले आहे. याप्रकरणी येरमाळा पोलीस ठाण्यात गावातीलच ६ जणांविरुद्ध अ‍ॅट्रॉसिटी (अनुसूचित जाती-जमाती अत्याचार प्रतिबंधक कायदा) आणि दंगलीसह विविध गंभीर कलमांखाली गुन्हा दाखल करण्यात आला आहे.

वाहीद जप्पू फकीर, जावेद जप्पू फकीर, गन्नी कोंडीबा फकीर, युसुफ उस्मान फकीर, जप्पू उस्मान फकीर आणि लाल्या युसुफ फकीर (सर्व रा. येरमाळा, ता. कळंब) अशी गुन्हा दाखल झालेल्या संशयित आरोपींची नावे आहेत. या हल्ल्यात आकाश सुरेश शिंदे (वय २५, रा. येरमाळा) हा तरुण व त्याची बहीण शीतल हे दोघे जखमी झाले आहेत.

शेत गट नंबर १४/२ मध्ये घडला प्रकार

पोलिसांनी दिलेल्या माहितीनुसार, फिर्यादी आकाश शिंदे आणि आरोपींच्या गटामध्ये शेतजमिनीवरून जुना वाद सुरू आहे. सोमवार, दि. १ जून रोजी रात्री १० ते मंगळवार, दि. २ जून रोजी पहाटे २ वाजेच्या सुमारास हा वाद पुन्हा उफाळून आला. आरोपींच्या टोळीने गैरकायद्याची मंडळी जमवून येरमाळा शिवारातील शेत गट नंबर १४/२ मध्ये प्रवेश केला.

तिथे त्यांनी आकाश आणि त्याची बहीण शीतल यांना गाठून शेतीच्या कारणावरून वाद घालण्यास सुरुवात केली. वाद वाढवून आरोपींनी त्यांना जाहीरपणे हीन वागणूक देत अश्लील व जातीवाचक शिवीगाळ केली.

लोखंडी पाईपने हल्ला आणि वाहनाची तोडफोड

विरोध केला असता, आरोपींनी स्वतःच्या ताब्यातील लोखंडी पाईपने आणि लाथाबुक्क्यांनी आकाश व शीतल यांच्यावर हल्ला चढवला. या हल्ल्यात दोघेही गंभीर जखमी झाले. मारहाण केल्यानंतर आरोपींनी परिसरात दहशत निर्माण करत “तुम्हाला जिवंत सोडणार नाही,” अशी थेट जीवे मारण्याची धमकी दिली. तसेच, पीडितांची रस्त्याकडेला उभी असलेली मोटरसायकल जोरात ढकलून देऊन तिचे मोठ्या प्रमाणावर नुकसान केले.

६ जणांवर अ‍ॅट्रॉसिटी अंतर्गत गुन्हा नोंद

या भयंकर प्रसंगानंतर पीडित आकाश शिंदे याने गुरुवारी, दि. ४ जून रोजी येरमाळा पोलीस ठाणे गाठून फिर्याद दिली. त्याच्या प्रथम खबरीवरून (FIR) ६ आरोपींविरुद्ध भारतीय न्याय संहिता (BNS) कलम ११९(१), ११८(१), ११५(२), १८९(२), १९१(२), १९०, ३३३, ३२४(२), ३५२, ३५१(२) सह ‘अनुसूचित जाती आणि अनुसूचित जमाती अत्याचार प्रतिबंधक कायदा’ (Atrocity Act) कलम ३(१)(r)(s) आणि ३(२)(va) अन्वये गुन्हा दाखल केला आहे.

वरिष्ठ अधिकाऱ्यांकडून तपास सुरू:

दंगल आणि जातीवाचक छळाचा गंभीर गुन्हा असल्याने या प्रकरणाचा पुढील तपास पोलीस उपअधीक्षक दर्जाच्या वरिष्ठ अधिकाऱ्यांच्या मार्गदर्शनाखाली येरमाळा पोलीस करत आहेत. गुन्हा दाखल झाल्यापासून संशयित आरोपी फरार असून, त्यांच्या अटकेसाठी पोलिसांनी शोधमोहीम तीव्र केली आहे.