धाराशिव: तालुक्यातील येवती येथे जुन्या भांडणाचा राग मनात धरून एकाच कुटुंबातील चौघांनी मिळून एका ५० वर्षीय व्यक्तीला शिवीगाळ करत लाथाबुक्क्यांनी आणि कुऱ्हाडीच्या दांड्याने मारहाण करून जखमी केल्याची घटना घडली आहे. पीडित व्यक्तीला जीवे मारण्याची धमकीही देण्यात आली. ही घटना २५ मे २०२५ रोजी सकाळी घडली असून, याप्रकरणी मंगळवारी (दि. २७) ढोकी पोलीस ठाण्यात गुन्हा दाखल करण्यात आला आहे.
दत्ता शाहु खांडेकर (वय ५० वर्षे, रा. येवती, ता. जि. धाराशिव) असे मारहाणीत जखमी झालेल्या व्यक्तीचे नाव आहे. त्यांनी दिलेल्या फिर्यादीनुसार, हरी शाहु खांडेकर, विजयमाला हरी खांडेकर, अंकीता हरी खांडेकर आणि ओंकार हरी खांडेकर (सर्व रा. येवती) यांनी २५ मे २०२५ रोजी सकाळी ९ वाजण्याच्या सुमारास मागील भांडणाचे कारण काढून दत्ता खांडेकर यांना शिवीगाळ केली.
यानंतर वाद वाढला असता आरोपींनी संगनमत करून दत्ता खांडेकर यांना लाथाबुक्क्यांनी व कुऱ्हाडीच्या दांड्याने मारहाण करून जखमी केले. तसेच, त्यांना जीवे ठार मारण्याची धमकीही दिली, असे फिर्यादीत म्हटले आहे.
घटनेनंतर दत्ता खांडेकर यांनी मंगळवारी, २७ मे २०२५ रोजी ढोकी पोलीस ठाण्यात धाव घेऊन तक्रार दिली. त्यांच्या फिर्यादीवरून पोलिसांनी हरी खांडेकर, विजयमाला खांडेकर, अंकीता खांडेकर आणि ओंकार खांडेकर यांच्या विरोधात भारतीय न्याय संहिता कलम ११८(१), ११५, ३५२, ३५१(२), ३५१(३), ३(५) अन्वये गुन्हा नोंदवला आहे. ढोकी पोलीस या प्रकरणाचा अधिक तपास करत आहेत. या घटनेमुळे येवती गावात तणावाचे वातावरण निर्माण झाले आहे.
