धाराशिव: येथील देशपांडे स्टँड भाजी मार्केटमध्ये एका २० वर्षीय तरुणाला जुन्या भांडणाच्या कारणावरून काठीने आणि लाथाबुक्क्यांनी मारहाण करून जीवे मारण्याची धमकी दिल्याचा प्रकार घडला आहे. ही घटना मंगळवार, दि. ०३ जून २०२५ रोजी सकाळी ६ वाजण्याच्या सुमारास घडली. याप्रकरणी चार जणांविरुद्ध धाराशिव शहर पोलीस ठाण्यात गुन्हा दाखल करण्यात आला आहे.
आर्यन सोमनाथ गाडेकर (वय २०, रा. भवानी चौक, धाराशिव) असे फिर्यादी तरुणाचे नाव आहे. त्याने दिलेल्या फिर्यादीनुसार, मंगळवारी सकाळी तो देशपांडे स्टँड येथील भाजी मार्केटमध्ये असताना आरोपी ईश्वर मधुकर कांबळे, मधुकर कांबळे, बबलु कांबळे आणि कालिंदा मधुकर कांबळे (सर्व रा. शेकापूर, ता. जि. धाराशिव) यांनी त्याला गाठले.
मागील भांडणाचा राग मनात धरून आरोपींनी आर्यनला शिवीगाळ करण्यास सुरुवात केली. त्यानंतर लाथाबुक्क्यांनी आणि काठीने मारहाण करून त्याला जखमी केले. तसेच, जीवे ठार मारण्याची धमकीही दिली, असे फिर्यादीत म्हटले आहे.
या घटनेनंतर आर्यन गाडेकर यांनी धाराशिव शहर पोलीस ठाण्यात धाव घेऊन तक्रार दिली. त्यांच्या तक्रारीवरून पोलिसांनी चारही आरोपींविरुद्ध भारतीय न्याय संहिता कलम ११८(१), ११५(२), ३५२, ३५१(२), आणि ३(५) अन्वये गुन्हा नोंदवला आहे. पोलीस या प्रकरणाचा पुढील तपास करत आहेत.
