मुरुम : मोटरसायकलला लात मारून खाली पाडल्याचा जाब विचारल्याने एका ३३ वर्षीय तरुणाला लोखंडी रॉड आणि काठीने बेदम मारहाण केल्याची घटना मुरुम (ता. उमरगा) येथील संभाजीनगर भागात घडली आहे. याप्रकरणी मुरुम पोलीस ठाण्यात तिघांविरुद्ध गुन्हा दाखल करण्यात आला आहे.
याबाबत सविस्तर वृत्त असे की, ही घटना १५ जानेवारी २०२६ रोजी सायंकाळी ५ वाजण्याच्या सुमारास घडली. फिर्यादी महेश सुरेश शिंदे (वय ३३, रा. संभाजीनगर, मुरुम) हे आपल्या भागात होते. यावेळी आरोपी बळीराम मधुकर चौधरी, विशाल देवीदास व्हनाळे आणि देविदास व्हनाळे यांनी फिर्यादीच्या मोटरसायकलला लात मारून ती रस्त्यावर पाडली.
महेश शिंदे यांनी ‘गाडी का पाडली?’ असा जाब विचारला असता, आरोपींनी चिडून जाऊन त्यांना शिवीगाळ केली. त्यानंतर आरोपींनी शिंदे यांना लाथाबुक्यांनी मारहाण करण्यास सुरुवात केली. एवढ्यावरच न थांबता, आरोपींनी लोखंडी रॉड आणि काठीने मारहाण करून महेश शिंदे यांना गंभीर जखमी केले. तसेच, यावेळी त्यांना जिवे मारण्याची धमकीही देण्यात आली.
या घटनेनंतर महेश शिंदे यांनी १८ जानेवारी २०२६ रोजी मुरुम पोलीस ठाण्यात फिर्याद दिली. त्यावरून पोलिसांनी बळीराम चौधरी, विशाल व्हनाळे आणि देविदास व्हनाळे यांच्याविरुद्ध भारतीय न्याय संहिता (BNS) कलम ११८(२), ११५(२), ३५२, ३५१(२)(३) आणि ३(५) अन्वये गुन्हा नोंदवला आहे. पुढील तपास मुरुम पोलीस करत आहेत.
