धाराशिव: शहरातील राघुचीवाडी येथे आर्थिक व्यवहाराच्या कारणावरून एका तरुणाला लाथाबुक्यांनी आणि खोऱ्याच्या दांड्याने बेदम मारहाण करून गंभीर जखमी केल्याची घटना घडली आहे. या प्रकरणी धाराशिव शहर पोलीस ठाण्यात दोघांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, या प्रकरणातील फिर्यादी विश्वनाथ दत्तात्रय ढेकळे (वय २८, रा. जुना बसडेपोच्या पाठीमागे, शिवरत्न चौक, धाराशिव) आणि आरोपींचा पैशांवरून वाद होता. दि. ३१ जानेवारी २०२६ रोजी दुपारी ४ वाजण्याच्या सुमारास राघुचीवाडी येथील आरोपी अजीम कुरेशी यांच्या वीटभट्टीवर हा प्रकार घडला.
आरोपी अजीम करीम कुरेशी आणि वसीम कुरेशी (दोघे रा. राजीव गांधी नगर, धाराशिव) यांनी जुन्या आर्थिक व्यवहाराचे कारण पुढे करत विश्वनाथ ढेकळे यांना शिवीगाळ केली. तसेच, लाथाबुक्यांनी मारहाण करत असतानाच खोऱ्याच्या दांड्याने मारून त्यांना गंभीर जखमी केले. यावेळी आरोपींनी फिर्यादीस जीवे ठार मारण्याची धमकीही दिली.
याप्रकरणी जखमी विश्वनाथ ढेकळे यांनी १ फेब्रुवारी २०२६ रोजी दिलेल्या फिर्यादीवरून धाराशिव शहर पोलीस ठाण्यात भारतीय न्याय संहिता (BNS) कलम ११८(२), २९६, ३५१(२), ३५२ आणि ३(५) अन्वये गुन्हा दाखल करण्यात आला आहे. पुढील तपास पोलीस करत आहेत.
