भूम – ‘तू जादूटोणा करून माझ्या वडिलांना मारलेस’ असा आरोप करत एका व्यक्तीने ३५ वर्षीय तरुणाला शिवीगाळ करून लाथाबुक्क्यांनी व फायटरने मारहाण करून जखमी केल्याची घटना भूम शहरातील एका हॉटेलमध्ये घडली आहे. याप्रकरणी भूम पोलीस ठाण्यात एका व्यक्तीविरुद्ध गुन्हा नोंदवण्यात आला आहे.
पोलिसांकडून मिळालेल्या माहितीनुसार, फिर्यादी यशवंत प्रकाश शिंदे (वय ३५ वर्षे, रा. गोलेगाव पारधीपिडी, ता. भुम) यांनी दिलेल्या तक्रारीनुसार, ही घटना मंगळवार, दि. १ एप्रिल २०२५ रोजी दुपारी साडेबारा वाजण्याच्या सुमारास भूम येथील वरद हॉटेल येथे घडली. आरोपी शिवाजी हरिदास काळे (रा. गोलेगाव पारधीपिडी, ता. भुम) याने फिर्यादी यशवंत शिंदे यांना ‘तू जादूटोणा करून माझ्या बापाला मारलेस’ असे म्हणून शिवीगाळ केली. त्यानंतर लाथाबुक्क्यांनी आणि फायटरने मारहाण करून जखमी केले.
याप्रकरणी यशवंत शिंदे यांनी १ एप्रिल २०२५ रोजी भूम पोलीस ठाण्यात दिलेल्या प्रथम खबरेवरून (FIR), आरोपी शिवाजी काळे याच्याविरुद्ध भारतीय न्याय संहिता (भा.न्या.सं.) कलम ११८(१), ११५(२), ३५२ अन्वये गुन्हा नोंदवण्यात आला आहे. पोलीस पुढील तपास करत आहेत.
शेत रस्त्याच्या वादातून शेतकऱ्याला मारहाण
भूम – तालुक्यातील चिंचोली शिवारात शेतीच्या रस्त्याच्या कारणावरून एका ३५ वर्षीय शेतकऱ्याला शिवीगाळ करून, लाथाबुक्क्यांनी व काठीने मारहाण करून जखमी केल्याची आणि जीवे मारण्याची धमकी दिल्याचा प्रकार घडला आहे. याप्रकरणी भूम पोलीस ठाण्यात दोन जणांविरुद्ध गुन्हा नोंदवण्यात आला आहे.
मिळालेल्या माहितीनुसार, फिर्यादी रेवननाथ महादेव वारे (वय ३५ वर्षे, रा. चिंचोली, ता. भूम ) यांनी दिलेल्या तक्रारीनुसार, ही घटना २९ मार्च २०२५ रोजी सायंकाळी साडेपाच वाजण्याच्या सुमारास चिंचोली शिवारातील शेत गट क्रमांक ६४४ मध्ये घडली. शेत रस्त्याच्या कारणावरून आरोपी मोहन बाबराव अस्वले आणि मनोज मोहन अस्वले (दोघे रा. चिंचोली, ता. भुम) यांनी फिर्यादी रेवननाथ वारे यांना शिवीगाळ केली. त्यानंतर त्यांना लाथाबुक्क्यांनी आणि काठीने मारहाण करून जखमी केले, तसेच जीवे ठार मारण्याची धमकीही दिली.
या घटनेप्रकरणी रेवननाथ वारे यांनी १ एप्रिल २०२५ रोजी भूम पोलीस ठाण्यात दिलेल्या प्रथम खबरेवरून (FIR), आरोपी मोहन अस्वले आणि मनोज अस्वले यांच्याविरुद्ध भारतीय न्याय संहिता (भा.न्या.सं.) कलम ११८(१), ११५(२), ३५१(२), ३(५) अन्वये गुन्हा नोंदवण्यात आला आहे. पोलीस पुढील तपास करत आहेत.
