मुर्टा (तुळजापूर) : जागेच्या जुन्या वादावरून एका ३८ वर्षीय महिलेला बेकायदेशीर मंडळी जमवून जातीवाचक शिवीगाळ करत लाथाबुक्क्यांनी मारहाण केल्याची घटना तुळजापूर तालुक्यातील मुर्टा येथे घडली आहे. याप्रकरणी नळदुर्ग पोलीस ठाण्यात पाच जणांविरोधात अ‍ॅट्रॉसिटी कायद्यासह भारतीय न्याय संहितेच्या विविध कलमांन्वये गुन्हा दाखल करण्यात आला आहे.
मिळालेल्या माहितीनुसार, मुर्टा येथील भीमनगर भागातील रहिवासी पंचशीला नवनाथ लोंढे (वय ३८) या ६ नोव्हेंबर रोजी सकाळी ११:३० वाजेच्या सुमारास गावात असताना जागेच्या वादावरून वाद उफाळून आला. संशयित आरोपी प्रल्हाद बळी सुरवसे, अशोक प्रल्हाद सुरवसे, लक्ष्मी अशोक सुरवसे, मुक्ताबाई प्रल्हाद सुरवसे आणि शुभम सुधाकर कदम (सर्व रा. मुर्टा, ता. तुळजापूर) यांनी गैरकायद्याची मंडळी जमवून फिर्यादी पंचशीला लोंढे यांना अडवले.
त्यानंतर आरोपींनी त्यांना हीन वागणूक देत जातीवाचक शिवीगाळ केली तसेच लाथाबुक्क्यांनी बेदम मारहाण करून जखमी केले. या मारहाणीनंतर पंचशीला लोंढे यांनी ७ नोव्हेंबर रोजी नळदुर्ग पोलीस ठाण्यात फिर्याद दिली.
फिर्यादीच्या जबाबावरून नळदुर्ग पोलिसांनी नमूद पाचही आरोपींविरुद्ध भारतीय न्याय संहिता (BNS) कलम १८९(२) (बेकायदेशीर जमाव), १९०, ३५१(२) (गुन्हेगारी धमकी), ३५२ (शांतता भंग करण्याच्या उद्देशाने अपमान) सह अनुसूचित जाती व अनुसूचित जमाती (अत्याचार प्रतिबंधक) कायदा (अ‍ॅट्रॉसिटी) कलम ३(१)(आर), (एस) अन्वये गुन्हा नोंदवला आहे. या प्रकरणाचा पुढील तपास नळदुर्ग पोलीस करत आहेत.
