धारशिव – भाची असल्याचे खोटे सांगून एका अनोळखी महिलेने उपळा येथील एका ७९ वर्षीय वृद्ध महिलेची सात हजार रुपयांची आर्थिक फसवणूक केल्याची घटना घडली आहे. या प्रकरणी धारशिव ग्रामीण पोलीस ठाण्यात गुन्हा दाखल करण्यात आला आहे.
पोलिसांकडून मिळालेल्या माहितीनुसार, उपळा येथील रहिवासी कुसुम संदीपान खामकर (वय ७९) यांच्या घरी दि. २३.०४.२०२५ रोजी दुपारी दीड वाजण्याच्या सुमारास एक अनोळखी महिला आली. तिने आपण कुसुम खामकर यांची भाची असल्याचे खोटे सांगितले. तसेच, कुसुम यांच्या पतीला शासनाकडून दीड लाख रुपये मिळणार असल्याचे सांगून, त्यासाठी लाखाला पाच हजार रुपये याप्रमाणे एकूण सात हजार रुपये फी म्हणून द्यावी लागेल, असे विश्वास देऊन सांगितले.
अनोळखी महिलेच्या या बतावणीला बळी पडून कुसुम खामकर यांनी तिला सात हजार रुपये रोख दिले. एवढेच नाही, तर त्या महिलेने कुसुम यांच्या पतीचे आधार कार्ड देखील घेतले आणि त्यांची फसवणूक केली.
या प्रकारानंतर फसवणूक झाल्याचे लक्षात आल्यावर, फिर्यादी कुसुम संदीपान खामकर यांनी दि. २३.०४.२०२५ रोजी धारशिव ग्रामीण पोलीस ठाण्यात तक्रार दाखल केली. त्यांच्या फिर्यादीवरून, धारशिव ग्रामीण पोलीस ठाण्यात भारतीय न्याय संहिता (भा.न्या.सं.) कलम ३१९(२), ३१८(४), ३१६(२) अन्वये अनोळखी महिलेविरुद्ध गुन्हा नोंदवण्यात आला आहे. पोलीस पुढील तपास करत आहेत.
