धाराशिव: शहरानजीकच्या तांबरी विभाग परिसरात एका बंद घरात भरदिवसा घरफोडीची घटना घडली असून, अज्ञात चोरट्याने सोन्याचे दागिने आणि रोख रक्कम असा सुमारे ४ लाख ४७ हजार रुपयांचा ऐवज चोरून नेला आहे. याप्रकरणी धाराशिव शहर पोलीस ठाण्यात गुन्हा दाखल करण्यात आला असून, पोलीस चोरट्याचा शोध घेत आहेत.
पोलिसांकडून मिळालेल्या माहितीनुसार, अश्वीनी गोविंदराव सोमवारे (वय ३२, सध्या रा. रचना हाईटस तिसरा मजला, सी-६, तांबरी विभाग, धाराशिव) यांनी या घरफोडीबाबत फिर्याद दिली आहे. फिर्यादी २३ एप्रिल २०२५ रोजी सकाळी ११ ते दुपारी ३ वाजेच्या सुमारास घराबाहेर होत्या. याच दरम्यान, अज्ञात चोरट्याने त्यांच्या बंद घराच्या मुख्य दरवाजाचा कडी कोंडा तोडून आत प्रवेश केला.
घरात प्रवेश केल्यानंतर चोरट्याने कपाटातील ड्रॉवरमध्ये ठेवलेले १३ तोळे २ ग्रॅम वजनाचे सोन्याचे दागिने आणि २५ हजार रुपये रोख रक्कम असा एकूण ४ लाख ४७ हजार रुपयांचा मुद्देमाल चोरून नेला. दुपारी घरी परतल्यानंतर घरफोडी झाल्याचे लक्षात येताच, अश्वीनी सोमवारे यांनी तात्काळ धाराशिव शहर पोलीस ठाण्यात धाव घेऊन तक्रार दाखल केली.
अश्वीनी सोमवारे यांनी दिलेल्या प्रथम खबरेवरून धाराशिव शहर पोलीस ठाण्यात अज्ञात चोरट्याविरुद्ध भारतीय न्याय संहिता (BNS) कलम ३३१(३) आणि ३०५ अन्वये गुन्हा नोंदवण्यात आला आहे. घटनेचा पुढील तपास पोलीस करत आहेत. भरदिवसा झालेल्या या घरफोडीमुळे परिसरात भीतीचे वातावरण पसरले आहे.
