उमरगा : उमरगा तालुक्यातील एका गावात १४ वर्षीय अल्पवयीन मुलीवर लैंगिक अत्याचार झाल्याची धक्कादायक घटना उघडकीस आली आहे. या प्रकरणी पीडितेने दिलेल्या तक्रारीवरून उमरगा पोलिसांनी एका तरुणाविरुद्ध भारतीय न्याय संहिता आणि बाल लैंगिक अत्याचार संरक्षण कायद्यान्वये गुन्हा दाखल केला आहे.
पोलिसांनी दिलेल्या माहितीनुसार, ही घटना १२ मे २०२५ रोजी पहाटे साडेतीन ते चार वाजण्याच्या सुमारास घडली. पीडित मुलगी घरी असताना गावातीलच एका तरुणाने तिला फोन केला. यावेळी त्याने पीडितेच्या भावाला आणि आईला जीवे मारण्याची धमकी देऊन तिला घराबाहेर बोलावून घेतले. त्यानंतर गावातील सौर ऊर्जा प्रकल्पाच्या शेडच्या पाठीमागे नेऊन तिच्यावर लैंगिक अत्याचार केला.
या घटनेनंतर आरोपीने पीडितेला कोणाला सांगितल्यास गावात बदनामी करण्याची धमकीही दिली. मात्र, पीडितेने धाडस दाखवत १३ मे २०२५ रोजी उमरगा पोलीस ठाण्यात फिर्याद दिली.
पीडितेच्या तक्रारीवरून पोलिसांनी आरोपी तरुणाविरुद्ध भारतीय न्याय संहिता कलम ६४ (लैंगिक अत्याचार), ६४(I) (गंभीर लैंगिक अत्याचार), ६५(A) (धमकी देऊन लैंगिक अत्याचार), ७४ (अपहरण किंवा अपहरणाचा प्रयत्न), ७८ (गुन्हा करण्यासाठी अपहरण), ३५१(२) (धमकी देणे) आणि ३५१(३) (गंभीर धमकी देणे) तसेच बाल लैंगिक अत्याचार संरक्षण अधिनियमातील कलम ४, ६ (गंभीर लैंगिक अत्याचार) आणि १२ अन्वये गुन्हा नोंदवला आहे. पोलीस या प्रकरणाचा अधिक तपास करत आहेत. पीडितेचे नाव आणि गाव गोपनीय ठेवण्यात आले आहे.
