धाराशिव पोलीस दलात मोठे फेरबदल: २२४ कर्मचाऱ्यांच्या प्रशासकीय बदल्या, ३१ जणांना मुदतवाढ

धाराशिव : धाराशिव जिल्हा पोलीस दलात मोठे प्रशासकीय फेरबदल करण्यात आले आहेत. पोलीस अधीक्षक रितू खोखर यांनी शुक्रवारी, ३० मे २०२५ रोजी आदेश जारी करत २२४ पोलीस अंमलदारांच्या प्रशासकीय बदल्या केल्या आहेत, तर ३१ अंमलदारांना विविध कारणास्तव मुदतवाढ देण्यात आली आहे. हा निर्णय जिल्हा पोलीस आस्थापना मंडळाच्या शिफारशींनुसार घेण्यात आला आहे.

पोलीस अधीक्षक कार्यालयातून जारी करण्यात आलेल्या आदेशानुसार (जा.क्र. प्रलि-आस्था/प्रशासकीय बदली/2025/4940), महाराष्ट्र शासन गृह विभागाचे विविध शासन निर्णय, अधिसूचना आणि पोलीस महासंचालक, महाराष्ट्र राज्य यांचे पत्र विचारात घेऊन हे फेरबदल करण्यात आले आहेत. यासाठी २१, २२, २३, २८ आणि २९ मे २०२५ रोजी आस्थापना मंडळाच्या बैठका पार पडल्या होत्या.

या बदल्यांमध्ये पोलीस शिपाई, महिला पोलीस शिपाई, पोलीस हवालदार, सहाय्यक पोलीस फौजदार, श्रेणी पोलीस उपनिरीक्षक आणि पोलीस नाईक अशा विविध पदांवरील अंमलदारांचा समावेश आहे. बदली झालेल्या अंमलदारांना त्यांच्या सध्याच्या नेमणुकीच्या ठिकाणाहून नवीन ठिकाणी प्रशासकीय कारणास्तव बदली देण्यात आली आहे. तसेच, जे पोलीस अंमलदार संलग्न करण्यात आले होते, त्यांना संलग्न तारखेपासून नियमित करण्यात येत असल्याचेही आदेशात म्हटले आहे.

प्रभारी अधिकाऱ्यांसाठी महत्त्वाच्या सूचना:

या आदेशात संबंधित पोलीस ठाणे आणि शाखांच्या प्रभारी अधिकाऱ्यांसाठीही काही महत्त्वाच्या सूचना देण्यात आल्या आहेत:

• बदली झालेल्या पोलीस अंमलदारांना त्यांच्या बदलीच्या ठिकाणी तात्काळ कार्यमुक्त करावे.
• कार्यमुक्त करताना बदली दाखल्यामध्ये अंमलदारांनी उपभोगलेल्या किरकोळ रजा व अर्जित रजेचा स्पष्ट उल्लेख करावा.
• अंमलदारांना कार्यमुक्त केल्याचा व ते बदलीवर हजर झाल्याचा दिनांक या कार्यालयास सादर करावा. जे प्रभारी अधिकारी बदली झालेल्या अंमलदारांना तात्काळ कार्यमुक्त करणार नाहीत, त्यांच्याविरुद्ध प्रशासकीय कार्यवाही करण्यात येईल.
• तपासी अंमलदारांना बदलीवर सोडण्यापूर्वी प्रभारी अधिकाऱ्यांनी त्यांच्याकडील तपासावर असलेले गुन्हे, अर्जचौकशी प्रकरणे ताब्यात घेऊन त्यांना कार्यमुक्त करावे.
• बदली झालेल्या अंमलदारांनी शासकीय निवासस्थान सोडताना वीज बिल भरल्याची खात्री संबंधीत प्रभारी अधिकाऱ्यांनी करावी.