धाराशिव: गायब झालेले मोबाईल आणि त्यातील ‘सिक्रेट डेटा’च्या चर्चेने आधीच ढवळून निघालेल्या तुळजापूर ड्रग्ज प्रकरणात आता आणखी एक मोठा हादरा बसला आहे. पिटू उर्फ विनोद गंगणे याने वेगवेगळ्या ‘फोन पे’ (PhonePe) खात्यांवरून लाखो रुपयांचे ड्रग्ज खरेदी केल्याचे तपासात निष्पन्न झाले आहे. या डिजिटल पुराव्यामुळे गंगणेभोवतीचा फास आवळला गेला असून, आता पोलीस त्याला ‘मुख्य आरोपी’ बनवणार का, याकडे सर्वांचे डोळे लागले आहेत.
डिजिटल ट्रेलने उघडकीस आणले रॅकेट
आतापर्यंत ‘इन्फॉर्मर’ म्हणून समोर येणारा आणि नंतर अटकेत गेलेला पिटू गंगणे हाच या रॅकेटचा एक प्रमुख खरेदीदार असल्याचे ‘फोन पे’च्या व्यवहारांनी जवळपास सिद्ध केले आहे. त्याने लाखो रुपयांचे व्यवहार वेगवेगळ्या खात्यांवरून केले, ज्यामुळे हे केवळ वैयक्तिक सेवनाचे प्रकरण नसून एका मोठ्या खरेदी-विक्रीच्या साखळीचा भाग असल्याचे स्पष्ट झाले आहे. या डिजिटल पुराव्यामुळे पोलिसांच्या हाती मोठा मासा लागला आहे.
गुन्हेगारांची ‘गँग’… आता लागणार का मकोका?
या प्रकरणाचे धागेदोरे केवळ ड्रग्जपुरते मर्यादित नाहीत. तपासात समोर आलेली माहिती तर आणखी धक्कादायक आहे. या प्रकरणातील अनेक आरोपी हे सराईत गुन्हेगार असून, त्यांच्यावर पाचपेक्षा जास्त गंभीर गुन्हे दाखल आहेत. एखाद्या संघटित टोळीप्रमाणे काम करणाऱ्या या रॅकेटची पाळेमुळे खोलवर रुजलेली आहेत.
या पार्श्वभूमीवर, आता या सर्व आरोपींवर महाराष्ट्र संघटित गुन्हेगारी नियंत्रण कायदा, म्हणजेच ‘मकोका’ (MCOCA) लावणार का? हा सर्वात मोठा प्रश्न निर्माण झाला आहे. जर पोलिसांनी ‘मकोका’ लावला, तर आरोपींना जामीन मिळणे जवळपास अशक्य होईल आणि या संपूर्ण ड्रग्ज सिंडिकेटची कंबर मोडली जाईल.
एकीकडे गायब झालेले मोबाईल, दुसरीकडे फोन-पे चे व्यवहार आणि तिसरीकडे आरोपींची गुन्हेगारी पार्श्वभूमी… या सर्व घडामोडींमुळे तुळजापूर ड्रग्ज प्रकरण एका निर्णायक वळणावर आले आहे. पोलीस आता गंगणेला मुख्य आरोपी घोषित करून या संघटित गुन्हेगारीवर ‘मकोका’चा वरवंटा फिरवणार का, हे पाहणे महत्त्वाचे ठरेल.
