धाराशिव: आर्थिक व्यवहाराच्या वादातून एका ४५ वर्षीय व्यक्तीला फरशीच्या तुकड्याने आणि लाथाबुक्क्यांनी मारहाण करून गंभीर जखमी केल्याची घटना उघडकीस आली आहे. ही घटना धाराशिव तालुक्यातील जागजी येथे घडली असून, याप्रकरणी ढोकी पोलीस ठाण्यात अरुण गजेंद्र सावंत याच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी लक्ष्मण तिमन्ना राऊत (वय ४५, रा. जागजी) आणि आरोपी अरुण गजेंद्र सावंत (रा. जागजी) यांच्यात आर्थिक व्यवहार होता. याच कारणावरून आरोपी सावंत याने दिनांक ११ मे २०२५ रोजी सायंकाळी ६ वाजण्याच्या सुमारास लक्ष्मण राऊत यांना शिवीगाळ करत लाथाबुक्क्यांनी व फरशीच्या तुकड्याने मारहाण केली. या मारहाणीत राऊत गंभीर जखमी झाले.
यानंतर, लक्ष्मण राऊत यांनी दिनांक १४ जून २०२५ रोजी ढोकी पोलीस ठाण्यात रीतसर फिर्याद दिली. त्यांच्या तक्रारीवरून पोलिसांनी आरोपी अरुण सावंत याच्याविरुद्ध भारतीय न्याय संहिता कलम ११८(२), ११८(१), ११५(२) आणि ३५२ अन्वये गुन्हा नोंदवला आहे. या प्रकरणाचा अधिक तपास ढोकी पोलीस करत आहेत.
