धाराशिव – विश्वासाने भाड्याने दिलेला ॲपे पिकअप टेम्पो परत न करता मालकाचा विश्वासघात केल्याची घटना धाराशिव शहरात उघडकीस आली आहे. टेम्पोचे भाडे देणे बंद करून वाहनही परत न केल्याने मालकाने अखेर पोलिसांत धाव घेतली. याप्रकरणी धाराशिव शहर पोलीस ठाण्यात एका व्यक्तीविरोधात गुन्हा दाखल करण्यात आला आहे.
या प्रकरणी चंद्रशेखर रोहीदास ढाले (वय ६५, रा. तुळजापूर नाका मार्केट यार्ड समोर, धाराशिव) यांनी फिर्याद दिली आहे. पोलिसांनी दिलेल्या माहितीनुसार, ढाले यांनी त्यांचा ॲपे पिकअप टेम्पो (वाहन क्र. एमएच १२ सीएच १०२३) आरोपी आयुब सरताज शेख (रा. टिपु सुलतान चौक, धाराशिव) याला २२ जुलै २०२४ पासून भाडेतत्त्वावर चालवण्यासाठी दिला होता.
आरोपी शेख याने काही काळानंतर ढाले यांना टेम्पोचे भाडे देणे बंद केले. फिर्यादी ढाले यांनी आपल्या मालकीच्या गाडीची मागणी केली असता, आरोपीने गाडी परत करण्यास टाळाटाळ केली आणि अद्यापपर्यंत वाहन परत केलेले नाही.
आपली फसवणूक झाल्याचे लक्षात आल्यानंतर चंद्रशेखर ढाले यांनी २० जून २०२५ रोजी धाराशिव शहर पोलीस ठाण्यात तक्रार दिली. त्यांच्या फिर्यादीवरून पोलिसांनी आरोपी आयुब सरताज शेख याच्याविरुद्ध भारतीय न्याय संहिता कलम ३१६(२) नुसार विश्वासघाताचा गुन्हा नोंदवला आहे. पोलीस या प्रकरणाचा पुढील तपास करत आहेत.
