लोहारा : तालुक्यातील तोरंबा येथे एका ३५ वर्षीय विवाहितेने राहत्या घरात गळफास घेऊन आत्महत्या केल्याची दुर्दैवी घटना घडली आहे. अनुसया सोपानकाका सगर असे मृत विवाहितेचे नाव आहे. याप्रकरणी पती, सासरे, सासू आणि दीर यांच्याविरुद्ध मानसिक छळ आणि आत्महत्येस प्रवृत्त केल्याचा गुन्हा लोहारा पोलीस ठाण्यात दाखल करण्यात आला आहे.
पोलिसांनी दिलेल्या माहितीनुसार, मयत अनुसया सगर यांनी २२ जून २०२५ रोजी सकाळी ६ वाजण्यापूर्वी तोरंबा येथील आपल्या राहत्या घरात गळफास लावून आपले जीवन संपवले. अनुसया यांच्या चारित्र्यावर संशय घेऊन त्यांचे पती सोपानकाका रामभाऊ सगर, सासरे रामभाऊ गुलचंद सगर, सासू अंजना रामभाऊ सगर आणि दीर शुभम रामभाऊ सगर हे सर्व जण गेल्या काही वर्षांपासून, १६ एप्रिल २०२० पासून ते २२ जून २०२५ पर्यंत, सतत शारीरिक आणि मानसिक छळ करत होते.
या त्रासाला कंटाळून अनुसया यांनी आत्महत्या केली, अशी फिर्याद मयत अनुसया यांच्या आई, मुक्ताबाई प्रकाश सगर (वय ६०, रा. माकणी, ता. लोहारा) यांनी लोहारा पोलीस ठाण्यात दिली आहे.
या फिर्यादीवरून लोहारा पोलिसांनी आरोपींविरुद्ध भारतीय न्याय संहिता कलम १०८, ८०, ८५, ११५, ३५२, ३(५) अन्वये गुन्हा नोंदवला असून पुढील तपास सुरू केला आहे. या घटनेमुळे परिसरात हळहळ व्यक्त होत आहे.
