ढोकी : लग्नाचे आमिष दाखवून आणि नंतर अपहरण करून १३ वर्षीय अल्पवयीन मुलीवर तीन तरुणांनी लैंगिक अत्याचार केल्याची अत्यंत धक्कादायक आणि संतापजनक घटना उघडकीस आली आहे. या प्रकरणी पीडितेने दिलेल्या फिर्यादीवरून ढोकी पोलीस ठाण्यात तिघांविरोधात पोक्सोसह विविध गंभीर कलमांखाली गुन्हा दाखल करण्यात आला आहे.
पोलिसांनी दिलेल्या माहितीनुसार, पीडित मुलगी ही एका गावातील रहिवासी आहे. गावातीलच एका तरुणाने २९ एप्रिल ते १६ जून २०२५ या कालावधीत तिला लग्नाचे आमिष दाखवून तिच्यावर वारंवार लैंगिक अत्याचार केला.
हा प्रकार ताजा असतानाच, १६ जून रोजी गावातील अन्य दोन तरुणांनी पीडितेस बुलेटवर बसवून शेजारच्या गावातील रस्त्यालगत असलेल्या एका पत्र्याच्या शेडमध्ये नेले. तिथे त्या दोघांनीही तिच्यावर पाशवी अत्याचार केला. घडलेल्या प्रकाराची वाच्यता केल्यास पीडिता, तिचे वडील आणि चुलत्याला जीवे मारून टाकू, अशी धमकीही आरोपींनी दिली होती.
या अमानुष अत्याचारामुळे आणि जिवे मारण्याच्या धमकीमुळे पीडिता प्रचंड घाबरली होती. अखेर तिने धाडस दाखवून २३ जून रोजी ढोकी पोलीस ठाण्यात घडलेला सर्व प्रकार कथन केला. तिच्या फिर्यादीवरून पोलिसांनी तिन्ही आरोपींविरोधात भारतीय न्याय संहिता कलम ६४, ६४(२), (एम), (आय), ६५(१), ७०(१), ३५१ (२),(३),(३)(५) सह लैंगिक अपराधांपासून बालकांचे संरक्षण (पोक्सो) कायद्याच्या कलम ४, ५(जी),(एल), ६ आणि ८ अन्वये गुन्हा नोंदवला आहे. पोलीस या प्रकरणाचा अधिक तपास करत आहेत.
