वाशी : मोटरसायकलवर लिफ्ट देण्याच्या बहाण्याने एका ५५ वर्षीय महिलेच्या गळ्यातील २५ ग्रॅम वजनाचे सोन्याचे दागिने हिसकावून पळून जाणाऱ्या आरोपीला वाशी पोलिसांनी तात्काळ कारवाई करत अटक केली आहे. आरोपीकडून चोरलेला मुद्देमाल जप्त करण्यात आला आहे. तानाजी बाबुशा काळे (वय ३०, रा. लक्ष्मी पारधीपिढी, तेरखेडा) असे अटक केलेल्या आरोपीचे नाव आहे.
याबाबत अधिक माहिती अशी की, फिर्यादी उषा अशोक खटावकर (वय ५५, रा. ईट, ता. भूम) या २३ जून रोजी सकाळी ११ वाजण्याच्या सुमारास तेरखेडा येथून सरमकुंडी फाट्याकडे जाण्यासाठी निघाल्या होत्या. यावेळी त्यांनी आरोपी तानाजी काळे याच्याकडे मोटरसायकलवर लिफ्ट मागितली.
प्रवासादरम्यान वाशी शिवारातील धुळे-सोलापूर महामार्गालगत असलेल्या घुले माळ परिसरात उषा खटावकर या नैसर्गिक विधीसाठी थांबल्या. त्या परत गाडीकडे येत असताना आरोपी तानाजीने संधी साधून त्यांच्या गळ्यातील २५ ग्रॅम वजनाचे सोन्याचे गंठण आणि मंगळसूत्र जबरदस्तीने हिसकावून घेतले आणि घटनास्थळावरून वेगाने पसार झाला.
या धक्कादायक प्रकारानंतर उषा खटावकर यांनी तात्काळ वाशी पोलीस ठाण्यात तक्रार दाखल केली. पोलिसांनी घटनेचे गांभीर्य ओळखून तातडीने तपासाची चक्रे फिरवली. आरोपी तानाजी काळे याला ताब्यात घेऊन त्याची कसून चौकशी केली असता, त्याने गुन्हा केल्याची कबुली दिली.
वाशी पोलिसांनी आरोपीला अटक केली असून, त्याच्याकडून गुन्ह्यात चोरलेले सर्व दागिने जप्त केले आहेत. या प्रकरणी वाशी पोलीस ठाण्यात गुन्हा नोंदवण्यात आला असून, पोलीस पुढील तपास करत आहेत.
