मुरुम : तालुक्यातील कंटेकुर येथे एका बंद घराचे कडी-कोंडा तोडून अज्ञात चोरट्याने सोन्या-चांदीचे दागिने आणि रोख रकमेसह एकूण ३९ हजार रुपयांचा ऐवज चोरून नेल्याची घटना घडली आहे. ही घटना २२ ते २३ जूनच्या रात्री घडली असून, याप्रकरणी मुरुम पोलीस ठाण्यात गुन्हा दाखल करण्यात आला आहे.
याबाबत अधिक माहिती अशी की, फिर्यादी वसंत धनराज धुमाळ (वय ३४, रा. कंटेकुर, ता. उमरगा) यांच्या घरात ही चोरी झाली. अज्ञात चोरट्याने २२ जूनच्या रात्री साडेदहा ते २३ जूनच्या पहाटे दीड वाजण्याच्या सुमारास धुमाळ यांच्या घराच्या दरवाजाचा कडी-कोंडा तोडून आत प्रवेश केला. त्यानंतर घरातील कपाटात ठेवलेले १३ ग्रॅम वजनाचे सोन्याचे दागिने, काही चांदीचे दागिने आणि १० हजार रुपयांची रोख रक्कम असा एकूण ३९,००० रुपयांचा मुद्देमाल चोरून नेला.
घरात चोरी झाल्याचे लक्षात आल्यानंतर वसंत धुमाळ यांनी २४ जून रोजी मुरुम पोलीस ठाण्यात फिर्याद दिली. त्यांच्या फिर्यादीवरून पोलिसांनी अज्ञात आरोपीविरुद्ध भारतीय न्याय संहिता कलम ३३१(४) आणि ३०५ अन्वये गुन्हा नोंदवला असून, पोलीस पुढील तपास करत आहेत.
